DEN HAAG – ‘Si bo no tin un camber of adres fiho, pospone bo binimento pa Hulanda cu un aña’. Esaki tabata e mensahe cu Arubahuis a manda diahuebs for di Hulanda, pa mustra e seriedad di e situacion pa haya cas. Segun Arubahuis, nan ta den pleno preparacion pa e binimento di e grupo di studiantenan na luna di augustus benidero. Den cuadro di esaki Arubahuis a ricibi diferente signal for di e mentornan cu hopi studiante cu ta biniendo Hulanda te ainda no tin camber of vivienda regla. Tambe cu un cantidad grandi di studiante no a inscribe na tempo pa un vivienda.
E situacion aki ta preocupante pa Arubahuis y e mentornan. Dicon? Pasobra semper Arubahuis a bisa cu e question di busca camber ta keda un responsabilidad di e studiante y di nan mayornan. ‘Nos como Arubahuis y e mentornan semper a purba na informa e studiantenan mas amplio posibel riba e tema aki. Ta bou situacionnan sumamente extraordinario Arubahuis por haci un apelacion na e Hogeschool, Universidadnan y cooperacion di vivienda pa intermedia. Pero Arubahuis mes no por regla of garantisa vivienda,’ asina directora a.i. di Arubahuis drs. Glenda Hernandez a bisa.
Segun sra. Hernandez semper Arubahuis a enfatisa e importancia pa tempran cuminsa orienta riba vivienda como studiante, mirando e scarsedad na camber of vivienda pa studiante den diferente region na Hulanda. Ta pesey riba e website di Departamento di Enseñansa tin un pagina totalmente dedica na e tema aki. Sra Hernandez: ‘Pa logra haya un camber of cas na e momentonan aki ta sumamente dificil, mirando cu e guera na Oekraina a ocasiona un fluho grandi di refugiado cu tambe mester un dak riba nan cabes. Hopi gemeente ta duna preferencia na refugiadonan for di Oekraina. Tambe gemeentenan ta controla severo riba huurmento di camber sin permiso. Y no ta tur doño di cas ta haya permiso pa huur un camber cu studiante, cu e consequencia cu e cantidad di cambernan ta sumamente scars.’
Arubahuis lo informa tur studiante cu ta biniendo Hulanda pa medio di un carta riba e situacion precario cu camber pa e motibo cu sin un adres fiho na Hulanda e studiante NO por inscribe su mes na un gemeente; no por haya un BSN (Burger Service Nummer) nummer y sin e BSN nummer e studiante no por habri un cuenta di banco y regla su otro asuntonan pa cu su estudio. Segun señora Hernandez esaki lo por nifica un mal comienso di nan estudio y lo trece hopi stress cune. ‘Si tene na cuenta e puntonan menciona ariba, nos conseho urgente ta pa anula bo binimento na Hulanda te ora cu bo tin perspectiva riba un adres fiho. Bin Hulanda sin un camber of adres fiho ta un gran risico pa bo mes y pa otronan. Si bo chens riba un camber e aña aki ta chikito, anto nos ta conseha pa haci tur e areglonan posibel pa otro aña bo por bin mihor prepara Hulanda. Pa e studiantenan cu ta pensando pa bin Hulanda na 2023, un suplica grandi pa cuminsa inscribi pa un camber of vivienda desde awor!’ segun declaracion di director a.i. di Arubahuis Glenda Hernandez.
Por ultimo señora Hernandez a bisa cu na tur momento studiantenan cu tin pregunta por haci esaki na e departamento di Enseñansa di Arubahuis of na un di e mentornan. E potret ta cortesia di Arubahuis
DEN HAAG – Rey Willem-Alexander y Reina Maxima a cancela nan bishita pa Vietman, un siman prome cu e biahe, debi na irregularidadnan na e pais asiatico. Nan a cancela e biahe, riba petiicon di autoridad di Vietnam. Ta bisa solamente cu ta pa ‘motibonan interno’ di e pais, pero no ta bisa kico exactamente ta e caso. E ta suficientemente serio pa e pareha Real cancela nan biahe.
DEN HAAG – Un parlamentario pa partido PvdD (Partij voor de Dieren) Robert Barker a haya un sota ayera nochi durante un reunion di directiva. Segun Barker, e la haya e sota di un comerciante rabia. Tabatin un debate riba e maneho di casitanan riba beach na Scheveningen. Y tabatin doñonan di e casitanan eynan. Y nan a rabia debi cu gobierno lo no a tene cuenta cu e casitanan aki den nan plan di destino. Ora cu e reunion a continua, Barker a informa cu porta e ta mustra poco turdi, pero esey tabata pasobra un rato prome, e la haya un sota di un comerciante envolvi. Polis a saca e comerciante for di e sla.
DEN HAAG – E partidonan Hulandes PVV, VVD, NSC y BBB mester bay negosha riba un ‘gabinete di programa’. E cuater partidonan en cuestion mester cera un acuerdo conciso riba puntonan principal prome, den cual ta stipula e metanan y e cuadro di maneho. Despues un ekipo di minister y secretarionan di estado mester desaroya un programa di gobernacion con tin cu logra e metanan stipula. Esey ta e conseho principal cu informador Kim Putters a entrega na e presidente di Tweede Kamer diahuebs.
DEN HAAG – Minister Plenipotenciario di Aruba mr. Ady Thijsen y director di Gabinete di Aruba mr. Joselin Croes a haci e lansamento di e website nobo di Gabinete di Minister Plenipotenciario di Aruba. Esaki a sosode den presencia di e personal di Gabinete di Aruba.
DEN HAAG - Despues di basta tempo di no a bishita nos isla, otro siman secretario di estado Hulandes Alexandra van Huffelen ta bishita Aruba atrobe. E la bishita e islanan di Caribe Hualndes frecuentemente pero a evita Aruba ya cu no tabatin progreso pa cu e combersacionan. Asina e mes a confirma pa e portal aki algun tempo atras. SIman pasa e mandatario a topa si caba na Hulanda cu prome mandatario di Aruba Evelyn Wever Croes, aunke no a logra yega na otro pa loke ta e reduccion di interes halto pa e refinanciamento di e debe di Covid. Di 19 te ku 26 di mart 2024 Sekretario di Estado Alexandra van Huffelen di Relashonnan den Reino ta realisá un bishita di trabou pa Aruba, Kòrsou i Sint Maarten. Pa gran parti e bishita aki ta den lus di e Akuerdo Mutuo Kolaborashon pa Reformanan. Den e kuadro aki na tur tres pais e Sekretario di Estado ta hiba kombersashon ku e minister presidente i otro ministernan tokante e kolaborashon i ehekushon i progreso di e Pakete di Pais. Tambe e mandatario ta papia tokante di e apertura di e Fondo Nashonal di Kresementu i e areglo di SDE++ pa e paisnan.
DEN HAAG- E lidernan politico Hulandes di PVV, VVD, NSC y BBB ta dispuesto pa bay Tweede Kamer si logra forma un gabinete nobo. Un di e condicionan ta cu e lider di patido PVV Geert Wilders no bira prome minister. A base di esaki, nan ta dispuesto pa sigui papia. Cu esaki e posibilidad pa un gabinete extraparlamentario, ta bira mas viable. Cu e cambio aki, ta mustra cu mayoria di e ministernan y secretarionan di estado por bin di pafo di politica, pero si por ta miembro di un partido politico. Un gabinete asina tin relacion special cu Tweede Kamer, pero no tin un programa di gobernacion detaya.