Anuncio di codigo cora a causa fila largo na mayoria pomp di gasoline na Aruba

ORANJESTAD – E efecto di e codigo cora, cu a pone cu tur lugar mester a cera mas tarda 2’or diaranson atardi, a crea un situacion poco caotico na tur pompstacion na Aruba, algo despues di e anuncio awe mainta. Na practicamente tur pompstacion, tabatin filanan masha largo, cu na su turno a crea un otro fila pa otro lugarnan cu a stagna trafico completamente. E ironia ta cu e ‘poco’ gasoline cu e persona lo por tabatin, tabata bay na para den fila of traficando pa yega na un of otro pompstation. Esaki siendo cu ta solamente pa algun ora e codigo ta valido. Pero e pensamento tras di e panico, por ta cu ta premira cu kizas lo tin dianan largo cu no tin coriente y consecuentemente falta di coriente y ningun hende no kier a keda ‘pega’ e ora ey. Si tur cos ta bon, ya pa diahuebs den curso di dia, operacion lo mester ta normal bek.