NHC: Ciclon potencial #2 por bira tormenta Bonnie diaranson merdia

MIAMI – E disturbio actualmente yama ‘Ciclon Potencial  # 2, por converti den Tormenta Tropical Bonnie pa diaranson merdia. Asina National Hurricane Center na Miami a informa diamars atardi den nan boletin di 5’or. Mes momento nan ta bisa cu ta premira awacero torencial ta riba islanan ABC tambe diaranson, y no ta descarta inundacion. Ta spera biento di forsa di tormenta tropical riba e islanan ABC pa diaranson anochi.  

UBICACION

E ubicacion di e disturbio actual tabata 200 km oost di Trinidad, cu biento maximo di 65 km (falta 20 km pa e bira un tormenta), y ta moviendo direccion west cu forsa di 39 km pa ora. 

FORMANDO

E disturbio ta continua generando conveccion fuerte cu ta estrecha mas leu cu su area principal, principalmnente e parti nort. No obstante esey, e avion di hurricane hunter ainda no ta logra haya un circulacion cerca, osea e wowo. Como tal ainda no por catalogue como un tormenta tropical. 

TERA FIRME

Cu e pensamento cu e disturbio tin cu pasa riba un area cu poco biento y un ambiente atmosferico humedo, pa e proximo dianan, e por intensifica mas ainda y pesey ta premira cu pa diaranson merdia e por haci e transicion pa un ciclon tropical. Di otro banda, su interaccion cu tera, incluyendo un masa di tera di sur America (Venezuela), esaki por limita e intensificacion te ora cu e sistema yega e parti zuidwest Caribense mas lat den siman. E ora e por haya mas forza y te hasta bira un horcan. 

 .