Si no paga school geld, cierto scol no ta duna rapport

ORANJESTAD – Cierto scolnan na Aruba a cuminsa pone presion riba mayornan pa paga e school geld di nan yiunan. Si e mayor (nan) no paga, e alumno(nan) na e respectivo school, no ta haya su (nan) rapport. Cu esaki e school lo kier mustra cu nan ta esun cu ta manda. Minister di enseñansa Michelle Hooyboer Winklaar a confirma na NoticiaCla.com awe cu e ta condena e hecho aki y lo tuma paso. Mes momento e la bisa cu ainda no tin un decision di gobierno pa cu e accionnan legal cu nan kier y por tuma contra Stichting Katholiek Onderwijs Aruba (SKOA) pa e aumento drastico di school geld. “Nos no a haya reaccion ainda di nan, y nos abogadonan ainda ta ocupa ta analisa tur e posibilidadnan legal” Hooyboer Winklaar a bisa

INVESTIGA

Mester bisa cu no ta tur scol esaki ta sosode, pero si cu e ta un problema na varios scol. E mandatario a confirma cu e ta bay investiga tur e kehonan di mayornan y lo pidi inspectie onderwijs pa cai aden y investiga e asunto aki. “Mi ta condena e asunto aki si enberdad e ta sosodiendo” e mandatario a sigui bisa. Na e emisora Power FM durante e noticiero merdia, a bira conoci cu enberdad mayornan a cuminsa raporta cu e asunto ta berdad y cu for di ayera, nan yiunan a bin cas cu e mensahe menciona, esta si no paga, cu no tin rapport.

COBRANSA SCHOOL GELD

Pa loke ta e fecha di cobransa y e accionnan di minister concerni, esey tambe ta canando. E fin di siman aki ta e ultimo dia pa paga e balansa di e school geld na e respectivo scolnan. Y esey ta pone e mayornan den un ‘incertidumbre’ pasobra nan no sa kico nan tin cu haci den e caso aki. SKOA ta obliga nan paga, y gobierno kier para esaki, y e mayornan ta mei mei, wardando.

CASO CONTRA SKOA

A puntra e mandatario kico ta pasa si dado caso mayornan a paga e suma, y den un caso legal SKOA perde, si e mayornan ta haya nan placa paga bek. E mandatario no por a confirma esey y a meramente ‘indica’ cu esey ta un posibilidad. Ta bin tambe e parti di leerplicht, osea enseñansa obligatorio. E ley ey ta obliga tur mucha di ta na scol durante ora di scol, sino tin cu sufri e consecuencia.

NENGA ADMISION NA SCOL

Problema sinembargo ta cu scolnan ta obliga mayornan paga cierto suma pa nan por wordo admiti na e scol. Sin esey, tecnicamente, nan lo no tin derecho di bay e scol. Pero segun e mandatario, ‘ningun scol por rechasa admision basa riba school geld.’. Esaki pasobra ‘acceso na scol ta algo universal y no por wordo nenga’.

ANALISIS DI PRESUPUESTO

Loke tambe e mandatario ta cuestiona ta cu a haci un analisis di SKOA y a resulta di e analisis (wak e analisis aki) cu e presupuesto di SKOA a aumenta durante curso di aña cu ta e placa cu ta ricibi pa studiante. Esaki no a baha den curso di añanan, aunke e cantidad di alumno, si a baha. Pues algo no ta cuadra eynan segun e mandatario