Gobierno purbando di remedia fayo cu pasaporte hulandes

ORANJESTAD – Gobierno di Aruba y DIMAS ta purbando na remedia e situacion di pasaporte cu a wordo otorga ‘robes’ na un cantidad di persona for di añanan 90. Prome minister Mike Eman a confirma e ‘problema’ aki pa NoticiaCla.com. “E ta un situacion hopi fastioso pa e personanan envolvi” e mandatario a cuminsa na bisa. “Tin biaha bo ta haya muchanan hopi inocente cu momento nan mayornan a haya nan pasaporte, a duna e muchanan tambe e pasaporte. Solamente pa tende cu despues di 10 aña, na e momento ey (di otorga e pasaporte na e mucha), e mucha no tabatin e derecho pa haya e pasaporte ey ainda” Eman a sigui bisa. “Ta trata di personanan cu a yega di renoba paspoort mas di un biaha caba”. “Y ora cu bo aplica e regla, manera cu mester ta, bo ta haya bo cu un situacion cu e pasaporte ta wordo ‘yama bek’ ”, e prome mandatario a bisa.

REGLA ESTRICTO

Mientras cu e mandatario ta conciente cu ta un situacion fastioso, e ta conciente cu na otro banda, e reglanan parse di ta hopi estricto. “E prome consehonan cu ta yegando mi despacho ta bisa cu e reglanan ta hopi cla y stricto riba esaki y cu no tin hopi espacio pa gobernacion tuma otro decision cu locual e regla riba e ley ta bisa”.

PROBLEMA BIEUW

E mandatario ta confirma cu e ta algo cu ta bay bek casi 20 aña atras, cu e fout di duna pasaporte na forma robez a sosode. Pero e ta sigura cu e no a wordo haci cu mal intencion. Mas bien un paso e tempo ey logico, basa riba e situacion di e mayornan. Ora cu mayornan tabata haya e pasaporte, tabata sali f0r di e punto di bista cu e yiunan tambe tabata haya. Pero e leynan no a wordo corectamente aplica, cu tur consecuencia cu esaki por tin.

POSIBEL SOLUCION

Aworaki, como gobierno, ta buscando un asina yama ‘versnelde procedure’ como opcion cu ta pone cu hobennan aki por wordo yuda. Ta trata tambe di varios caso di hobennan cu mester bay studia afo e aña aki. Ta tratando riba esaki y con pa remedia esaki. E mandatario no por a bisa exactamente cuanto hende ta envolvi den esaki, pero sigur riba 10. Ta trata segun e mandatario di hobennan cu e aña aki ainda ta cabando Colegio Arubano, keriendo cu nan ta hulandes, y diripiente a bin tende cu nan pasaporte no a wordo prolonga y a perde esaki.

SOLUCION NA DIMAS

Pa loke ta DIMAS, NoticiaCla.com a haya confirmacion cu enberdad e problema aki ta existi. Segun directora di DIMAS, Kathy Ruiz- Paskel a bisa NoticiaCla.com cu te aworaki un total di 7 persona a acudi serca nan aworaki di cual tur a haya un permiso pa tempo indefini of un permiso temporario di un aña como famia. Of si ainda nan ta menor di edad, un declaracion tipo 3G. Tabatin 2 cu anteriormente tambe a haya nan caso resolvi temporal cu un permiso pa tempo indefini duna. “Pues tin 9 caso resolvi. No ta conoci si demas ta canando nan caminda legal” Ruiz -Paskel a sigui bisa.