No a tuma decision ainda riba asunto di visa pa colombianonan

ORANJESTAD – Gobierno di Aruba ainda no a tuma un decision riba e asunto di otorgamento di visa pa colombianonan bin Aruba. Prome minister Mike Eman a confirma esaki na NoticiaCla.com (NC). Segun Eman, Corsou y St Maarten hunto cu Aruba hunto tin un responsabilidad como paisnan cu ta den e region, pa mira hunto cu Hulanda y Europa, ora cu introduci cierto cambionan den visa, con e ta impacta e diferente paisnan. “Cada pais tin e derecho pa haci e evaluacion” Eman ta bisa. E ta referi aki specificamente den cuadro di e cantidad di persona cu bo tin den bo pais, cuanto fluho bo ta spera di e cambionan. “Nos naturalmente tin un responsabilidad pa cu Aruba, con nos kier pa nos pais desaroya,. Den e contexto aki nos a yega na tuma e iniciativa pa yega na un flexibilidad di e visa” e mandatario a sigui bisa. Aki e ta referi na e hecho cu a sali di e punto di bista cu si un persona colombiano tin visa pa drenta Merca, e tin visa pa drenta Aruba. “Asina den e mesun contexto cu nos relacionnan ta wordo evalua den e forma mas huicioso pa Aruba, nos ta mirando e caso aki tambe”. E mandatario a bisa cu e decision mientrastanto no a cay di parti di Aruba. “Ainda ta mirando e diferente aspecto di e cambionan kico ta e plus y min y mira con nos por pone den un contexto cu ta plus plus so por tin.