De Meza: RvC ta para pa desisionnan cu nan a tuma na WEB

ORANJESTAD – Gobierno lo no cuminsa kita hende for di trabou, sin argumenta. E ta referi aki na e caso di hedging na WEB pa prijs mas bentahoso pa compra di Heavy Fuel Oil. E decision final cu Raad vanCommissarissen (RvC) di WEB a tuma, ta un decision cu nan ta para pe segun e mandatario a bisa NoticiaCla.com, y cu nan ta sinti cu nan a haci bon. Esey no kier men cu gobierno ta bay core kita nan awor cu a resulta cu e decision no tabata bentahoso. E mandatario a bisa cu ta evaluando e situacion ainda y lo tuma su decision na su debido tempo.

SACA CONCLUSION

E mandatario a sigura cu e la papia cu nan (esta RvC) y cu nan a bise cu ora cu nan a haya e proposicion (di hedging) cu a wordo presenta na nan, nan a analisa esaki y a haya e paketenan presenta door di WEB. Y RvC a tuma un decision y e decision ey nan ta sinti cu por a bay ambos direccion. Mes momento e mandatario ta bisa cu cada ken den Raad van Commissaris pa nan mes, mester tuma nan conclusionnan. “Gobierno ta haci su evaluacionnan. Un miembro di RvC of e raad completo por dicidi cu nan ta baha of ta bisa cu nan a haci un trabou segun nan consenshi limpi y nan ta sinti cu nan no a haci nada malo y ta propone cu nan ta keda”.

RETIRO MIEMBRO RvC

Mes momento e mandatario a confirma cu un miembro di hunta di comisario di WEB, Rik Timmer a retira despues di un campaña den cierto medio, contra e persona aki. “Ta un lastima pasobra e persona aki a base di e posicion cu e tabatin, nunca a participa den e discusionnan aki. Semper (e) la wanta e honor pa no ta presente na momento cu tabata negocia algo cu un compania cu e tabata representa (den e caso aki EcoGas). “E persona aki a traha den Raad van Commissaris pa añanan largo, bou di signatura tambe di MEP y AVP. Un persona cu merece e credibilidad cu ta wordo duna na dje” de Meza a sigui bisa. E ta la lamenta cu politica ta haci asesinato di caracter contra dje.

MOCIONAN PASA DEN PARLAMENTO

Tanto Hunta di Comisario di WEB como Utilities NV ta trahando mas lihe cu ta posibel pa por ehecuta e mocionnan cu a wordo pasa recientemente den parlamento, dirigi na e ‘problema di WEB’. Ta trata di mocionnan cu ta regarda mehoranza na e planta di awa WEB, relaciona cu cosnan cu a pasa cu lo no a bay bon y cu tin consecuencia serio pa e compania. “Esnan cu ta posibel, esnan cu ta alcansabel pa werk esaki uit. E lo tuma su tempo pero lo purba haci esaki mas liher cu ta posibel” e minister encarga cu utilidad, Mike de Meza a sigura NoticiaCla.com.