Den luna di mei DIMP a registra 206,2 miyon florin na entrada

Den luna di mei DIMP a registra 206,2 miyon florin na entrada

Posted on 06/22/2022 6:01 pm AST | Updated on 06/22/2022 6:06 pm AST

ORANJESTAD – Departamento di Impuesto  (DIMP) como departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal, a registra 206,2 miyon florin na entrada. Asina e instancia a raporta diamars. E  ta un tarea cu un responsabilidad grandi pa cu presupuesto di pais Aruba pa asina gobierno y e otro instancianan manera ATA, AZV y SVB por ricibi e parti di entrada cu ta toca nan, pa asina por cumpli cu henter comunidad di Aruba. Den luna di mei 2022, Departamento di Impuesto a registra un total di 123,3 miyon florin na entrada di impuesto y 82,9 miyon florin na entrada pa otro instancia y/of departamento. Aki ta sigui un bista di e sumanan colecta:

Un total di 82,9 miyon florin a wordo colecta pa entre otro instancianan manera ATA, AZV, SVB, DIMAS, y DIP na toeristenheffing, primanan di AOV/AWW y AZV, erfpachtscanon y entrada pa gasto di permiso di DIMAS.

ENTRADA COMPARA CU OTRO AÑANAN

E entradanan di impuesto colecta di januari te cu mei di aña 2022 compara cu e añanan anterior ta como lo siguiente:

E entradanan total di Departamento di Impuesto no a alcansa ainda e nivel di entrada manera e tawata na aña 2019, e aña prome cu pandemia. Sinembargo e cifranan ta demostra e esfuerso continuo cu e departamento y su contribuyentenan ta haci pa cu e cumplimento cu pago di impuesto.

CUMPLIMENTO DI PAGO DI IMPUESTO 

Un di e tareanan importante di Departamento di Impuesto ta pa informa y conscientisa su contribuyentenan riba tur topico di impuesto cu e meta pa aumenta e cumplimento boluntario di pago di impuesto. Esaki no ta un tarea facil. E departamento tin cu ehecuta e leynan di impuesto caminda no solamente ta tene cuenta cu e obligacion di cada contribuyente sino tambe cu nan derechonan.

Cumplimento cu impuesto ta sumamente importante pa e contribuyente ta al dia cu su pagonan y/of restitucion y ta sigura tambe entrada pa gobierno y e otro instancianan cu ta brinda servicio na henter e comunidad di Aruba. 

INCUMPLIMENTO CU IMPUESTO TIN CONSECUENCIA

Pa casonan di incumplimento, e departamento tin e deber di actua uzando e instrumentonan cu ley ta permiti. Normalmente ta asina cu ora un cobransa sali, ley ta permiti e contribuyente pa paga e suma por ehempel den dos luna. Si acaso no cumpli cu pago na tempo of no cera un areglo di pago, e ora e proceso di cobramento cu forsa di ley ta cuminsa. Den e proceso aki, e contribuyente ta haya un carta di recordatorio of aanmaning. Si despues resulta cu ainda e contribuyente no a cumpli, por pasa pa impone un ordo di retencion riba salario, beslag riba su pertenencianan y por culmina hasta den un benta publico. Pues, e proceso di cobramento aki gradualmente ta bira mas severo y ta depende con leu e contribuyente mes ta laga su caso avansa. 

CARTA DI RECORDATORIO A SALI

E prome paso den tur proceso di cobramento ta start cu un carta di recordatorio conoci tambe como un aanmaning. E carta aki ta recorda e contribuyente cu e no a cumpli cu su impuesto y mayoria bes ta duna un periodo limita pa cumpli ainda prome cu sigui mas leu. 

Den e dianan aki e departamento a saca 33.211 carta di aanmaning pa 957 contribuyente cu no a cumpli cu nan impuesto. Tin contribuyente cu lo ricibi mas cu 100 aanmaning y otronan cu lo ricibi entre 30 y 99 aanmaning debi na e frecuencia di incumplimento. 

E cartanan di aanmaning aki ta destina tanto pa personanan priva como empresanan, recordando nan pa cumpli ainda. Ta trata di incumplimento pa cu pago di entre otro grondbelasting, erfpacht, loonbelasting, BBO y otro impuestonan mensual. E contribuyentenan aki no a paga nan cobransa, no a haci un areglo di pago y tampoco no a entrega un carta di obhecion. 

Departamento di Impuesto ta urgi tur contribuyente cu a ricibi un aanmaning, pa no keda sin actua. No ta recomendabel pa laga e proceso di cobramente keda bira mas severo. Esaki ta causa un peso financiero mas grandi ya cu e tin gasto extra mara na dje y por hasta trece consecuencia mas pisa pa e contribuyente. Cumplimento cu impuesto ta den beneficio di un y tur. Keda sin cumpli no ta un opcion. Paso na final: cumpli cu impuesto ta cumpli cu Bo pais.

  • CAFt a confirma cu a ricibi contesta y ta analisando reaccion di gobierno di Aruba!

    CAFt a confirma cu a ricibi contesta y ta analisando reaccion di gobierno di Aruba!

    ORANJESTAD – E colegio di supervision financiero pa Aruba CAFt a confirma pa noticiacla cu nan a ricibi e contesta di gobierno riba nan ultimo reaccion. “Esaki ta wordo analisa aworaki” e colegio a sigui bisa  diabierna mainta. Awor tin cu warda wak kico CAFt lo bisa bek, y si e contesta di gobierno ta suficiente pa CAFt deshaci di e pensamento pa conseha conseho di minister di Reino riba e supuesto ‘incumplimento’ di Aruba, acompaña pa un recomendacion pa duna Aruba un instruccion. Si e ultimo reaccion di gobierno no ta suficiente, por spera e conseho negativo proximamente.

  • Departamento di Impuesto a habri su portanan bek diabierna mainta

    Departamento di Impuesto a habri su portanan bek diabierna mainta

    ORANJESTAD – Departamento di Impuesto a informa cu e tabata cla pa brinda servicio bek na tur contribuyente entrante awe diabierna, 1 di juli 2022. A haci tur trabao preparativo durante e dia di 30 di juni. Staf y personal di Departamento di Impuesto a logra controla tur ekipo pa cualkier dan?o di awasero tanto na e oficina principal na Camacuri como tambe na tur MFA y na Postkantoor San Nicolas. E tecniconan y personal di Departamento di Impuesto a logra start tur e sistemanan digital bek y a haci e testnan necesario cu exito.

  • Lotto ta duna bo chens pa gana casi un miyon florin awe nochi!

     Lotto ta duna bo chens pa gana casi un miyon florin awe nochi!
  • WEB a suspende aumento di tarifa di awa temporalmente!

    WEB a suspende aumento di tarifa di awa temporalmente!

    ORANJESTAD – WEB Aruba NV diabierna den un anuncio mes sorpresivo cu esun anterior, a dicidi pa suspende e aumento di tarifa di awa anuncia pa awe, temporalmente. Asina e compania a informa diabierna mainta trempan. Segun e compania, nan a dicidi pa tuma tal decision, den consulta cu e accionista Utilities Aruba NV. Mientras ta bisa temporalmente, no ta conoci con largo esaki lo keda suspendi. For di ayera nochi, noticiacla a tende e rumor aki y a puntra minister di energia Glenbert Croes si esaki tabata berdad. E mandatario a reacciona bisando solamente cu awe mainta e lo tabata topico di discusion den conseho di minister.  

  • ATIA ta cuestiona cu sector publico a keda cera awe siendo cu tur cos ta ‘back to normal’

    ATIA ta cuestiona cu sector publico a keda cera awe siendo cu tur cos ta ‘back to normal’

    ORANJESTAD – Aruba Trade & Industry Association (ATIA) a bisa diahuebs mainta cu, “como representante y e voz di comerio di Aruba no ta compronde dicon sector publico ta keda sera si sector priva si por a habri awe 30 juni, un dia despues di PTC2”. Segun e gremio, sector priva ta depende di sector publico den varios area pa fungi efectivamente.  Por pensa riba DOW, Aduana, Arubus, DIP, DIMAS, DPL y DIMP, cu ta departamentonan clave pa sector priva por ta productivo. 

  • WEB: Tarifa di awa ta aumenta diabierna awor!

    WEB: Tarifa di awa ta aumenta diabierna awor!

    ORANJESTAD – Entrante 1 di juli tarifa di awa ta subi cu un averahe di Awg. 1.50 pa m3. E aumento ta debi na un aumento drastico di Heavy Fuel Oil (HFO) di ±126%, compara cu aña 2021. Hunto cu e aumento e compania di awa y energia ta introduci un structura di tarifa nobo, cual ta conduci na un particion mas husto entre consumidornan grandi y consumidornan chikito. Clientenan lo nota e aumento di tarifa pa prome biaha den cuenta di awa di augustus 2022.

  • Powered by SETAR