ORANJESTAD – IVA a raporta diamars cu a cera practica di ortodontista y a detene. Riba diamars 21 di november 2021, Inspeccion di Salud Aruba (IVA) a haci un bishita di inspeccion na un practica di e ortodontista Abdalhadi Kawaiah pa stop e ortodontista di traha inmediatamente. IVA ya caba tabata den un trayectorio pa prohibi e ortodontista aki di traha. Esaki pa motibo cu e no tin e autorisacion rekeri mas pa traha como ortodontista na Aruba. Na yegada na e practica, IVA a haya prueba cu e ortodontista ta trahando ainda. Pues a stop e di traha y a pasa e caso pa Ministerio Publico (Openbaar Ministerie) pa persecucion penal.
ADVERTENCIA NA JUNI 2022
IVA a adverti e ortodontista na comienso di juni 2022 caba cu e no mag di sigui traha pa motibo cu su peticion pa inscribi den e registro di AruBIG na DVG no a wordo aproba. Despues cu IVA a ricibi un notificacion cu e ortodontista lo ta trahando ainda, a dicidi di haci un bishita di inspeccion pa stop e di traha inmediatamente. Sinembargo, pa motibo cu e ortodontista no a duna su cooperacion, IVA a dicidi di pasa e caso over pa Ministerio Publico.
INSCRIBI DEN REGISTRO
Prome cu por traha na Aruba como ortodontista of dentista, bo mester ta inscribi den e registro di AruBIG cu ta wordo maneha door di Departamento di Salud Publico (DVG). DVG ta e instancia cu ta controla si un dunado di cuido tin e papelnan/educacion rekeri pa por eherce su trabou como dunado di cuido. Esaki conforme e Landsverordening beroepen in de gezondheidszorg. Cu introduccion di e registro di AruBIG, tin 5 grupo di dunadonan di cuido cu mester ta registra, esta dokter (incluyendo specialista), dentista (incluyendo specialisacionnan manera p.e. ortodontista), fisioterapista, boticario y partera. Den e proximo añanan lo agrega: enfermera, psicologo (gezondheidspsychologen) y psicoterapista. Manera cu bo ta inscribi den e registro aki, bo tin e autorisacion rekeri pa traha na Aruba pa locual bo a inscribi p’e. Por ehempel, un neurologo mag traha solamente como un neurologo of un partera mag di traha solamente como un partera.
MONITORIA CALIDAD
IVA, cu ta un instancia completamente separa di DVG, ta e instancia cu ta monitoria e calidad di cuido cu ta wordo duna na Aruba. Pues nos ta monitoria despues cu un dunado di cuido ta registra y ta trahando caba y nos lo actua ora cu constata cu tin un peliger pa cu e calidad di cuido y/of ora cu dunadonan di cuido ta actua contra ley. Riba 31 di maart 2022 tur dunado di cuido a haya un notificacion di IVA cu lo duna un multa ora cu constata cu tin un dunado di cuido trahando cu no ta registra den e registro di AruBIG y pues no ta autorisa pa traha na Aruba. E suma di e multa por bay te un maximo di Afl. 500.000 pa cada violacion di articulo den ley.
MINISTERIO PUBLICO
Sinembargo, IVA por dicidi tambe di pasa casonan over pa Ministerio Publico pa persecucion penal. Por dicidi pa haci esaki ora cu IVA a adverti y actua contra un dunado di cuido caba, pero cu e dunado di cuido ta keda viola ley of ora ta trata casonan hopi delicado. Mas detayes por lesa den nos maneho ‘Onbevoegde beroepsbeoefenaars’ riba nos website www.iva.aw.
Pa siguridad di tur pashent, ta sumamente importante pa e dunado di cuido tin e autorisacion rekeri y ta registra den e registro di AruBIG. Si tin cualkier persona cu lo por ta na altura di tipo di casonan similar, por tuma contacto cu IVA telefonicamente: 526 2160, via whatsapp: 593 6373, via Facebook (Inspectie Volksgezondheid Aruba) of via email na [email protected].
ORANJESTAD - Desde 2019 131 a incorpora un Conseho Hubenil den nan organisacion. E Conseho Hubenil di 131 su tarea ta pa primeramente duna conseho solicita y no solicita na e organisacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organisacion un bista cu precision di kiko ta pasando bao di mucha y hoben y pakiko.
ORANJESTAD - Den cuadro di transparencia y informacion nos di Horacio Oduber Hospital ta comparti cu boso e cifranan pa loke ta luna di februari 2024. Como Hospital ta importante y alabes interesante pa duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto baby a nace durante luna, cuanto pashent a regresa cas despues di admision y mas.
ORANJESTAD – Faltando 4 luna pa e eleccion presidencial di Venezuela, un grupo di Venezolano residencia na Aruba a expresa su preocupacion y frustracion ‘pa e ausencia di material electoral den Consulado (di Venezuela) na Oranjestad. Asina e portal di Venezuela LaPatilla.com ta raporta. Segun e portal, un grupo di Venezolano a presenta nan disgusto na e sede di Consulado. Mes momento nan a informa nan mes di e rekisitonan nobo cu ciudadanonan Venezolano residencia na Aruba mester cumpli cu ne pa por eherce nan derecho di voto: Carda di Censo, y cedula di identidad di Aruba, y pasaporte y cedula Venezolano vigente.
ORANJESTAD - Aruba Tourism Authority (A.T.A.) a firma acuerdo di un aña cu Fundacion Parke Nacional Aruba (FPNA). Cu e acuerdo strategico aki, A.T.A. ta reafirma su compromiso pa sigui traha di cerca cu FPNA como un sosten mutuo pa cu esfuersonan continuo den proteccion y preservacion di nos naturalesa..