Stranheronan perdiendo paspoort hulandes pa fayo administrativo

ORANJESTAD – Un grupo relativamente grandi di persona hoben ora di renoba nan paspoort hulandes, a y ta hayando e ‘sorpresa’ desagradabel, cu diripiente nan no tin derecho mas riba e paspoort hulandes ni e nacionalidad hulandes. Y ora Censo participa nan esey pa medio di un carta (lesa e carta’1’ y carta’2’ aki), e pasaporte ta wordo tuma ‘in beslag’ y destrui. E motibo duna ta cu un investigacion for di 2009 ta indica cu pa motibo di un ‘fout’ administrativo (bayendo bek na comienso di añanan 90), e persona en cuestion, e tempo ey a haya nacionalidad hulandes y e pasaporte corespondiente. Un derecho cu awor ta resulta, cu e no taba(tin). Di un dia pa otro e persona ta keda sin pasaporte, nacionalidad y perdi. Mientrastanto ta haciendo tramite pa resolve e asunto y toch ‘yuda’ e grupo di persona aki ‘recobra’ e nacionalidad y pasaporte bek.

CENSO BOU DI CURATELA

Segun hefe di Censo, e tambe ta confirma e problema cu otorgamento robes di pasaporte, pero esaki tabata prome cu su tempo. “E no ta algo solamente na Aruba sinembargo, pero cu a tuma lugar na otro islanan den Caribe tambe” Luydens ta splica. E ta splica tambe cu enberdad e problema di pasaporte ta uno conoci, y cu aworaki nan ta purbando di resolve e asunto.

CASONAN PENDIENTE

NoticiaCla.com a compronde cu tin por lo menos 30 caso (cu ta conoci) di hendenan cu nan bida a bira ‘cabes abou’ den un instante. Y den nan, tin di hendenan  cu tin pasaporte hulandes caba entre 13 pa 30 aña. Y ta despues di e tempo ey ta bin tende cu ‘un fout a ser haci y cu ‘per abuis’ nan a bin na remarke pa bira ‘hulandes’.

ESNAN PERHUDICA

E problema mas grandi ta pa e grupo di hoben aki cu e.o. tabata den tramite cu nan documentonan pa bay studia na Hulanda, y a bin tende cu door di cu nan ‘no ta hulandes’, no ta haya lening, y ta wordo manda DIMAS pa regla nan permiso ‘atrobe’. Otronan cu a haya pasaporte, y a haya yiu despues, diripiente no ta hulandes mas. Ni nan, ni nan yiu. Nan bida asina a cambia den cuestion di ‘un frega di wowo’, lagando nan sin documento legal sea di Hulanda of nan pais di origen.