Van Huffelen: RMR por aproba asunto di recorte salarial pa Aruba sin warda Corsou y St Maarten

ORANJESTAD – Conseho di Minister di Reino Hulandes (RMR) no mester warda riba un acuerdo cu tur tres isla, esta Aruba, Corsou y St Maarten riba e recorte di salario. “RMR por dicidi tambe solamente pa Aruba” secretario di estado Hulandes Alexandra van Huffelen a contesta noticiacla durante e conferencia di prensa comun dialuna atardi, unda cu tabatin tambe tres premier di Aruba, Corsou y St Maarten. E pregunta ta a raiz di e declaracion anterior di e mandatario Hulandes cu ‘ainda no a yega na un acuerdo cu Corsou y St Maarten’ riba e asunto di recorte salarial, mientras cu Aruba si. E ora e pregunta a bin cu si pa diabierna e dos islanan ainda no yega na un acuerdo, cu esaki ta stroba Aruba pa si haya ok. E mandatario Hulandes a sigura pues cu no. Pues si tur cos ta bon, diabierna awor, Aruba lo mester haya e aprobacion final pa cu e recorte di 5.5% cu ta cuminsa otro luna pa trahadonan di gobierno di Aruba.