Mas pais den region a pone ‘medida’ pa e ‘turista’ venezolano

CARACAS – No ta Aruba so ta tumando paso pa sigura cu bishitantenan di Venezuela no ta haya nan cu sorpresa durante nan estadia. E informacion cu NoticiaCla.com a trece ayera (lesa articulo aki), a trece hopi comentario tanto local como di afo. Mientrastanto otro paisnan a cuminsa tuma nan propio medida contra ‘turistanan venezolano’, aunke cu rason diferente. Den e caso di paisnan specifico manera Mexico, nan ta yama e practica aki, proteccion contra e asina yama ‘raspacupos’. Hendenan cu ta biaha cu e unico meta di yega e pais respectivo, raspa dollar mericano y bolbe Venezuela. Aruba su medida ta mas bien dirigi pa salvaguardia e ‘turista’ venezolano mes, cu ta haya su mes desampara.

RASPACUPOS

Paisnan manera Mexico a pone un paro riba e tipo di biaheronan cu ta practica ‘Raspacupos’ y ta basicamente ‘deporta’ e grupo di venezolanonan aki ora cu nan haya nan ta actua cu e meta menciona. Den e ultimo dos siman por lo menos 33 venezolano a keda deporta for di Mexico pa motibo cu nan tabata practica e modalidad di ‘raspacupos’.

CASO DI ARUBA

Pa Aruba, e caso ta mas specifico. Cada persona cu biaha pa Aruba pa un periodo maximo di 4 dia, ta asigna nan 500 dollar, di cual 300 ta pa gasta cu credit cart y 200 na placa cash. Si e estadia na Aruba surpasa 8 dia, e asignacion ta aumenta na 700 dollar pa credit cart y 300 na efectivo, esta cash. Tanten un venezolano por presenta esey ora cu nan yega Aruba, nan por tin entrada. Foto archivo di aeropuerto maiquetia