Gobierno a prohibi compania Emtrasur temporalmente pa aterisa na Aruba

ORANJESTAD - Gobierno di Aruba diabierna a anuncia cu temporalmente ta stop e avion di e compania Emtrasur di aterisa na Aruba. Gobierno a sigui informa di a tuma nota di publicacionnan tocante un vuelo recien di e compania Emtrasur pa Argentina. E compania aki tambe a efectua un vuelo di carga pa Aruba for di Paraguay, dia 16 di mei 2022, pa trece un cargacion grandi di cigaria. E hecho cu e avion tabata carga un tripulacion internacional dudoso y cu un avion sanciona, a crea un problema internacional, unda cu na Paraguay tambe gobierno eynan a tuma medida pa loke a sosode.  

PERMISO

E problema ta cu e avion a trece 755 mil dollar na cigaria, cu tripulacion di 18 persona di nacionalidad Irani y Venezolano, pa e compania TABESA. Nan tabata wordo pilotea pa   Gholamreza Ghasemi Abbas, presunto accionista y miembro di e  conseho di administración y director ejecutivo di e compañaa aereo Qeshm Fars Air, utilisa pa e  Guardia Revolucionaria Irani (IRGC) pa traslada arma y material militar pa Siria durante e guerra civil. E avion Boeing 747 ta pertenece na e aerolínea irani Mahan Air y ta sanciona pa Merca. E avión tin marca di identificacion de Emtrasur, un filial di e aerolinea nacional venezolano Conviasa, cu tambe ta bou sancion Mericano desde februari di 2020.  Mientrastanto e avion a biaha pa Argentina unda cu e la keda prohibi di continua cu su buelo.

ARUBA

A base di loke a pasa na Argentina a dicidi cu no lo duna e compania aki permiso mas te ora cu tin mas claridad riba e alegacionnan treci dilanti. E autoridadnan concerni na Aruba ta bezig ta colectando mas informacion tocante e caso for di instancianan (internacional) concerni y a base di esaki lo tuma un decision final.