Empleadonan di Laser Airlines deteni pa droga den avion pa Aruba

CARACAS – Autoridad venezolano a logra detene 4 empleado di e compania aereo venezolano Laser, y un agente di seguridad VeneAVCSec siman pasa den estado Vargas na Venezuela. Nan ta wordo sospecha di a sconde cocaina den un avion di e aeroliña Laser Airlines, cu tabata rumbo pa Aruba riba 18 di maart ultimo.

DETENCION

Esnan deteni ta entre otro inspector Pedro Delgado, supervisor Franklin Viloria, y e mecaniconan Rauger Pérez y Carlos Verherl, y e agente de seguridad Yeffersson Romero, pa ‘ delito di trafico di substancia illegal y e intento pa transporta esaki’. Nan a keda deteni a base di e leynan venezolano di droga, y ‘delincuencia organisa y financiamento di terorismo’.

ENCARCELACION

Ora cu e grupo di persona a presenta dilanti un huez, e la ordena encarselacion di e 5 hombernan cu lo keda sera den e prison Rodeo III den e estado Miranda.

E SUSESO

Tabata riba 18 di maart cu un agente di seguridad na turno a realisa un chekeo rutinario riba e avion prome cu e avion sali pa Aruba. Esaki tabata necesario pasobra e avion a pasa anochi na e terminal aereo. Tabata e momento ey cu a haya droga scondi entre otro den e baño di e avion, un cantidad di 8 kilo di droga y 270 gram di cocaina.