Venezolanonan confronta cu ‘medida’ ora biaha pa Aruba

ORANJESTAD – Pasaheronan di Venezuela pa Aruba tin cu demostra cu nan tin suficiente fondo pa pasa nan estadia riba nos isla. Sino nan no por drenta. For di ayera, pasaheronan di Venezuela biahando pa Aruba y Panama, a haya nan mes confronta cu e mensahe na bali di aerolineanan na aeropuerto. Investigacion cu NoticiaCla.com (NC) a haci cu autoridadnan local, ta indica cu esaki no ta algo nobo. “Posiblemente nan a cuminsa re-inforsa esaki mas activo for di awe”, un fuente a sigura NC ayera. E aviso ta conta pa pasaheronan cu biaha pa Aruba y Panama. No ta conoci pakico otro destinacionnan no tin un mencion asina.

MENSAHE

E mensahe cu e pasaheronan venezolanonan tabata ricibi, ta bisa cu ‘ Ta informa tur pasahero cu pa rekisito di e autoridadnan migratorio di Panama y Aruba, mester tin como rekisito obligatorio, $500 den efectivo, pa su ingreso”. Esey tabata poni riba un papel pega na tur e counter nan di aeropuerto di La Chinita di Maracaibo, na Venezuela. No ta conoci si e tabata poni ayera na otro aeropuertonan di e pais Andino.

GASTONAN CUBRI

E informacion cu NC a logra compila di autoridad di Aruba, ta bisa cu ‘ta depende cuanto dia e turista a indica cu e lo permanece na Aruba, imigracion ta puntra pa demostra un suma cu ta rasonabel pa e por cubri su estadia’. Den e caso aki, e suma di 500 dollar ta cubri 4 pa 5 dia di estadia si no tabatin reservacion haci prome, na un hotel. ‘Pues e suma no ta uno fiho, pero mas bien ta depende di e e dianan cu tin intencion di keda’. Esaki ta nifica cu si e persona keda mas tempo, e tin cu por compronde cu e por tin e medionan financiero pa esaki.

Ora cu e pasahero aki drenta Aruba, e mester por demostra un pasport valido, ticket round-trip, y placa cu e por gasta pa un cantidad di dia.

NADA NOBO

Riba su mes, esaki no ta informacion nobo, pero si pa pasaheronan na e aeropuerto menciona, pa cual e la bira un noticia cu a subi retnan internacional, alertando pasaheronan venezolano cu intencion di biaha pa Aruba y Panama.