Figaroa: Waf di APA na Barcadera ta cla fin di juli

ORANJESTAD – E waf di APA lo ta cla pa fin di juli y Astec lo sigui cu e trabounan cu nan ta calcula mester ta cla na januari 2016. E hecho cu waf di carga ta move di Playa pa Barcadera no ta nifica cu tin un cambio den e trabounan cu ta wordo haci door di Aruba Ports Authority (APA) y Astec. Esaki ing. Jossy Figaroa a splica den un declaracion cu el a duna na momento cu Prome Minister Mike Eman y Minister Mike de Meza a haci un “site-inspection” na sitio di e proyecto.

ENCARGO DI KADE

APA ta bay ta completamente encarga cu e parti di e kade, cu ta e responsabilidad di nan. Astec a haya un parti di e tereno den “erfpacht” for di APA pa haci e trabou cu nan mester realisa. Ta bay tin edificio pa inmigracion, douane, pa Polis, etc. Tin suficiente tereno pa unabes e waf bira un hub, nan por sigui amplia nan facilidadnan.

WAF NOBO

E trabounan riba e waf nobo, ya caba a enfrenta un reto, esta di ricibi un barco grandi cu ta construyendo plataforma den bahia di Maracaibo. E barco grandi lo bini Aruba pa abastece su mes cada bes cu ta necesario y haci cambio di tripulacion. E ta un servicio cu APA no a spera riba dje, pero mester a tum’e mirando loke e ta nifica pa economia di Aruba.

DESAROYO NA WAF

Tur e desaroyonan cu tin andando na waf, ta mandando señalnan positivo y incluso autoridadnan di haf di Miami a expresa interes caba y tabata kier sa con e sistema di hub por bay funciona. Pero esaki ta puntonan cu lo mester sigui reuni riba nan den futuro.

BARCONAN DI CARGA

Na final di e trabounan, e waf di carga lo por ricibi barconan di carga basta grandi (cu un draft di dies meter) y por acomoda tres barco grandi na mesun momento. Barconan tambe por baha nan mercancia na Aruba y for di aki ta manda nan pa nan destinacion den Latino America y Caribe. Mas di esaki ta bay wordo discuti durante un conferencia na Panama unda lo mustra riba e servicionan cu Aruba ta bay ofrece den e proximo añanan. “Mi ta optimista cu nos lo ta cla na tempo y denter di e presupuesto poni, pero tambe cu e futuro, door di e proyecto nobo aki, ta mustra hopi mas miho pa e mundo maritimo y pa Aruba,” Jossy Figaroa a duna di conoce.