DE L’ISLE: Ampliacion waf Barcadera ‘on schedule’

ORANJESTAD –E proyecto di waf na Barcadera ta ‘on schedule’. Esaki segun e director di e compania cu lo maneha gran parti di e operacion, esta Astec, Mike de L’isle. Tabata durante un ‘site inspection’ awe di prome minister Eman y Minister Mike de Meza na e proyecto di renobacion y ampliacion di waf di Barcadera, de L’isle a elabora mas ariba.

E PROYECTO

E proyecto aki ta uno cu ta wordo realisa door di Aruba Ports Authority y ASTEC y ta encera un inversion di 120 miyon florin. E tarea di cada un ta keda mescos cu e situacion actual na Playa, esta APA ta encarga su mes cu e operacion di e waf mientras cu ASTEC ta tuma na su encargo e parti di movecion di carga. Desaroyo di e waf na Barcadera ta trece un movecion economico grandi pa Aruba y ta haci e pais un hub pa move carga pa resto di area den Caribe y Latino America.

INVERSION

De L’Isle a splica cu 30% di e inversion calcula a wordo hinca caba den e trabou cu ta wordo haci na e area di Barcadera. “Nos ta avansando cu nos proyecto. Nos ta na caminda pa keda cla fin di aña y inicio di otro aña cuminsa muda pa Barcadera y keda operacional. Alabes, nos ta trahando estrechamente cu e team di APA,” De L’Isle a duna di conoce.

CANCHA

ALBO, Arubaanse Wegenbouw y Croon ta trahando caba riba e cancha unda lo instala e kraan grandi pa baha carganan for di e barconan. Aki e director di ASTEC a menciona cu e grua nobo lo ta uno electrico y masha moderno. E terenonan ta wordo cubri cu klinkers y a sigura cu esaki ta apto pa tur ekipo cu ASTEC ta bay ta usando riba e area aki.