Raad van Advies cu conseho negativo pa presupuesto 2015

ORANJESTAD – Tanten gobierno no tene e consehonan presenta y recomenda pa Raad van Advies, gobernador di Aruba no mester presenta e presupuesto 2015 na parlamento pa aprobacion. Asina e organo consultativo ta bisa den su comentario final di e presupuesto 2015, cu NoticiaCla.com a pone su man ariba awe merdia. E presupuesto mientrastanto a keda entrega awe mainta na parlamento y lo cana su caminda awor pa wordo aproba. (lesa conseho y presupuesto completo aki).

CONSEHO

"Berdad cu gobierno a conoce un adelanto den caso di pone ordo riba algun asuntonan structural. Pero ta mucho tempran pa pidi instancianan internacional pa un opinion" e organo ta sigui bisa. Segun e organo, awor parlamento tin cu tene cuenta cu e consehonan duna di Raad van Advies, aunke e conseho ta keda netamente esey. Di otro banda, aña pasa tabata cla cu despues cu parlamento no a duna oido na e consehonan di Raad van Advies, gobernador a opta pa no firma esaki ni despues cu e la keda aproba pa parlamento completo.

IMPLEMENTA 

Segun RvA, gobierno mester cuminsa implementa e adaptacionnan, y e reorganiacion di pais Aruba mester ta completa. Tambe gobierno mester dicidi pa caba, ken tin cu controla e reglanan di presupuesto. “A studia suficiente for di 2013. Ta ora pa actua, tuma decision y ehecuta esakinan’. Tambe a conseha pa keda cla cu e presupuesto prome cu 1 di mei 2015, sino e ta perde e posibilidad pa sigui haci gastonan.