Ley pa detene chauffeur burachi cu causa accidente grave y fatal

ORANJESTAD - Minister di husticia Arthur Dowers a sigura dialuna, cu for di februari caba a manda cambio ley di trafico pa por detene chauffeurnan burachi cu causa accidente grave y fatal. Segun e mandatario, el a pidi pa cambio den ley cu ta permiti detene un persona cu maneha bou influencia di alcohol y causa accidente. E cambio ta algo cu a bin ta trahando riba dje for di inicio di aña y ta en espera pa e yega parlamento pa e wordo trata.

DETENE CHAUFFEUR

E mandatario comentando riba e cambio, a sigura cu e hecho cu kier crea e posibilidad pa detene chauffeurnan burachi cu causa accidentenan fatal no ta algo cu a surgi despues di e accidente fatal cu a causa bida di un menor di edad. E cambio en cuestion a bin ta trahando riba dje for di inicio di aña y na februari ultimo el a wordo manda pa Raad van Advies.

PARLAMENTO

Na momento cu e organo aki caba cu su evaluacion, e cambio proponi ta wordo manda Parlamento pa e wordo trata den un reunion publico. “Nos a traha pa bini cu e cambio aki, pa motibo cu nos tin un maneho cu ta actua severo contra personanan cu ta maneha auto bou influencia di alcohol,” Minister Dowers a duna di conoce. “E cambio aki no tin nada di haber cu ningun caso specifico, tampoco e caso di siman pasa.”

MANDA SEÑAL

Y a agrega cu como gobernante, e ta sinti cu mester manda un señal cla den comunidad cu e asunto di coremento bou influencia ta algo hopi serio cual lo por tin consecuencianan grave pa personanan cu ta haciendo uzo di careteranan di Aruba, incluyendo esun tras di stuur. “E ta importante cu e señal cu a wordo duna 5 aña pasa caminda a laga sa cu ta tuma e siguridad den trafico na serio, y cu esaki ainda ta e caso.” E aspecto cu ta papia di dje aki ta: casonan caminda un persona a core bou di influencia di alcohol y a causa accidente cu dañonan grave na personanan of cu consecuencianan fatal, cu e chauffeur aki lo por wordo poni den detencion preventivo ( Voorlopige Hechtenis).