Corsou ta gana Hondura den wega di CONCACAF Nations League

SAN PEDRO SULA  - Ayera nochi selekshon di Kòrsou a enfrentá selekshon den nan di dos wega di CONCACAF Nations League. Esaki despues di a pèrdè e promé wega ku skor mínimo djabièrnè den stadion Ergilio Hato. Kòrsou a kuminsá ku un 4-3-3 ayera. Kaminda tabatin 3 modifikashon di e 11 ku a kuminsá e promé djabièrnè na Kòrsou. Leandro Bacuna, Juninho Bacuna a drenta na lugá di Roly Bonevacia i Kenji Gorre. Miéntras ku Roshon van Eijma a remplasá Suently Alberto ku no a rekuperá kompletu di su leshon.

Selekshon di Kòrsou a kuminsá e wega bon ku 2 chèns di gol den e promé 10 minütnan di wega, pero no a logra konkretisá niun di nan dos. Honduras mesun kos ku djabièrnè tabata kuminsá vários di nan atakenan riba Kòrsou su banda robes di defensa.

Na di 34 minüt despues di un kòrner kòrtiku di Cuco Martina, Leandro Bacuna ta probechá di un rebote pa depositá esaki den gol i asina manda Kòrsou ariba. Esaki tabata e di dos gol di Leandro Bacuna den su karera kontra Honduras. I e promé tempu a finalisá ku Kòrsou ganá ku skor di 1 pa 0.

Honduras ta kuminsá e di dos tempu ku 4 kambio. Ku e kambionan Honduras  ta sòru  pa buta hopi preshon riba e defensa di Kòrsou. Na di 65 minüt di wega Honduras tabatin gritunan  pa penal na momentu ku Eloy Room ta kòrta un avanse di un delantero hondureño den área penal. Rèfri a bisa no tin nada kontra e deseonan di hungadónan di Honduras. Selekshon di Kòrsou a pasa den situashonnan di hopi peliger pero a keda mantené nan gol limpi. Tabata na di 82 minüt despues di un remate violento di Leandro Bacuna, ku Vurnon Anita krusa e bala den área penal pa Anthony van den Hurk depositá esaki den gol. Na di 94 minüt  Honduras ta kòrta e bentaha ku un gol. Pero Kòrsou ta gana ku skor di 2 pa 1.

Ku e viktoria aki selekshon di Kòrsou ta para awor riba Honduras riba e tabla ku tur dos selekshon faltando dos wega kontra Canada. Selekshon di Kòrsou lo ta den akshon dia 9 di yüni awor kontra Canada. NOTA: Texto ta scirbi den Papiamento fonetico di Corsou.