Elmar: Problema di coriente na Dakota y besindario a resulta di ta serio

ORANJESTAD – Awe mainta varios area di Dakota ainda ta sin coriente despues cu esaki a bay for di ayera nochi despues di 7’or. Awe mainta e compania Elmar ta confirma e seriedad di e problema. E compania ta confirma cu for di ayera nochi pa mas menos 7.20 p.m. nan a haya nan ta confronta cu un interupcion di coriente den Dakota y becindario. “Mesora nos tecniconan a sali pa atende cu esaki y a dura basta pa por a logra localisa unda precisamente e fayo aki a origina.Por a logra suministra coriente bek den algun area alrededor di 8’or p.m. te cu 3’or di marduga”.

E problema mes a resulta di ta uno grandi, cu un kabel di 12.000 volt bao di tera, den vecindario di Karawarstraat. ELMAR su tecniconan di ayera nochi ta trahando incansablemente pa por resolve e problema aki, cu te ainda tin algun area den Dakota afecta. “Nos tecniconan ta haciendo nan maximo esfuerzo pa por reconecta e suministro di coriente lo mas lihe cu nan por, pero ta premira cu esaki por dura un 3 pa 4 ora ainda”.

ELMAR a pidi su disculpa na su clientenan cu ta afecta pa e interupcion di coriente aki.