“ Mi por tin opinion riba asunto cu tin interes di Aruba”

ORANJESTAD – “Mi ta kere cu mi por tin un opinion riba un asunto cu ta di interes di Aruba”. Asina parlamentario di MEP Glenbert Croes ta pensa riba e loke e la declara diasabra na Consulado di Venezuela. Na e ocasion ey, e parlamentario a bisa cu ‘e decreto (di Barack Obama) ta ‘totalmente infunda y nos ta kere cu e mester wordo revoca, pasobra Venezuela no ta menasa pa ningun hende”.E declaracion ey a lanta hopi stof. Esaki a pone cu awe mainta e parlamentario a clarifica e loke e la bisa durante e conferencia di prensa semanal di e partido. Segun Croes, e no ta haya cu e la subi riba tereno di relacionnan exterior, haciendo declaracionnan cu e la haci. “Y mi ta kere cu e ta den interes di Aruba”, Croes a bisa, refiriendo na su declaracion di diasabra.

INVITACION CONSULADO

Segun Croes, ta riba invitacion di consulado, cu e la acudi na e evento cu e consulado a organisa. E actividad tabata pa demostra na mundo cu ‘Venezuela kier solamente paz y pa presidente mericano Obama, kita e ‘medida’ cu e la pone contra Venezuela’. “Mi a bise cu nos gesto di solidaridad cu Venezuela, ta mas bien un pedido na Merca y Venezuela pa tin paz entre nan dos. Pa nan busca a caminda di pas entre Venezuela y Merca den interes di nan pais pero tambe den nos region”. Segun Croes su declaracion awe, tanto Merca como Venezuela ta un pais ruman y cu Merca ta e prome fuente di entrada di turismo pa Aruba, y Venezuela ta e di dos mercado pa Aruba den e area aki.

CASO CARVAHAL

Segun Croes su declaracion, e no kier imagina su mes cu surgi un conflicto entre Merca y Venezuela, y kico e consecuencia lo por ta pa nos turismo. “Manera mi a bisa nan, nos a haya un voorproefje, un sabor, di kico por a bira, a rais di e susesonan den e caso Carvahal”. Tambe Croes a bisa cu hopi importante, e paisnan tin un deber pa tin paz entre nan mes y den region.

MERCA Y CUBA

E la uza e ehempel di Merca y Cuba canando un caminda di dialogo di paz pa normalisa e relacion entre e dos paisnan. Segun Croes, ta esey ta e mensahe cu e la manda diasabra na Consulado.