Aruba porfin a conoce ‘Het eiland van mijn vader’ di Izaline Calister

ORANJESTAD – Despues di hopi tempo, porfin diadomingo anochi Aruba a haya e chens di experencia e presentacion di ‘Het eiland van mijn vader’, un obra di e artista yiu di Corsou Izaline Calister y e musico Hulandes Thijs Borst. Un proyecto cu a inicia cu un idea na 2018, y cu a bira e proyecto conoci, unda cu Izaline ta laga e publico cera conoci cu e isla di Corsou, for di bista di su Thomas. E produccion final a bira un combinacion di naracion filma di e tata, combina cu cantamento di cancionan di e tempo ey door di Izaline, y intercambia cu anecdotanan di e relacion entre Izaline y su tata, asisti pa e musico Thijs Borst cu a mustra su parti humuristico fuera di su expertisio musical. Un sala practicamente yen a goza sin fin di e presentacion, y cu a premia e artistanan cu un ‘standing ovation’

COMBINACION

Loke a haci e anochi interesante y cu tabata dificil a la vez pa cualkier artista presenta, ta e interaccion entre Izaline cu e parti filma. Pero e forma cu esaki a keda produci, combina cu e agilidad facil di Izaline di papia, a crea un intercambio casi ‘real’ entre pantaya y e tempo real. Combina cu e parti humoristico di custumber di Izaline, entre su persona y su musico amigo pa 10 aña caba, e la crea un ambiente ameno cu e publico y a logra e coneccion importante ey. E presentacion tabatin historia, tristeza, amor, aprecio, orguyo y alegria, tur den uno unda cu den apenas 2 ora y cuarto, Izaline a sa di presenta e isla for di e bista di su tata, y alabez laga e publico conoce Corsou su aspecto completo, cultural historico, y alabez pinta un bista di e bida di un famia yiu di Corsou den un forma asina dinamico, cu e ta haci cualkier yiu di Corsou orguyoso di su isla y su hendenan.

JUNIOR

Un di partinan hopi gusta, tabata e momento unda cu Izaline ta pidi pa un homber cu e apodo di junior (esun cu ta carga e mesun nomber di su tata), subi escenario, pa asina Izaline por dedica 'su amor' p'e. Un forma di Izaline pa repasa un di su romancenan di hubentud, cu su 'Juni'. Manera Izaline a bolbe splica, ta trta di un hoben cu ta carga e mesun nomber di su tata, y consecuentemente ta haya e apodo di jr, pa ilustra e status ey. Cu e pensamento cu 'mester' tin un junior den publico, a invita un homber cu tambe ta un 'junior', y a laga su mes wordo deleita, cu e publico completo como testigo. Sigur un di e momentonan exitoso di e anochi. 

HULANDES

Loke hopi porta no a spera, ta cu mayoria di e presentacion tabata den e idioma Hulandes, intercambia aki aya cu e Papiamento crioyo, mientras cu mayoria di e cancionan presenta, si tabata na Papiamento. Esaki ta grandemente debi cu e obra tabata uno traha pa e audiencia Hulandes. Izaline a mustra su dominio di e idioma Hulandes, y por compronde con e obra aki a bira un exito rotundo na Hulanda y yena salanan completo. 

EMOCION

Mientras cu e anochi tabata yena di suficiente momento di emocion personal pa Izaline, e la sa di demonstra su mes   cu un dominio emocional, cu ta mustra su profesionalismo mas cu tur cos. Pero na final, ora cu e publico a premia e artista cu un aplauso largo combina cu un standing ovation, ey si Izaline no a contene su emocion y por a mira e lagrimanan sali. Un otro anochi y presentacion exitoso di Izaline Calister (cu Thijs Borst), cu a laga tur esnan presente, cu un curazon contento y un alegria di por a presencia e anochi aki. Danki na Cas di Cultura pa a ofrece e publico e oportunidad aki di trece e presentacion ‘Het eiland van mijn vader’ pa Aruba.