LaSorte: Si un hotel no ta paga bo 100% ainda, busca otro trabou

ORANJESTAD – “Si bo ta trahando un caminda (hotel:red) cu ta pagando bo 60% ainda, busca otro trabou”. Asina CEO di Aruba Hotel & Tourism Association (AHATA), Tisa LaSorta a bisa e siman aki durante e programa Noticiacla LIVE. E ta contesta esaki riba e pregunta di periodista Tito Laclé, riba e hecho cu ainda tin keho cu no tur hotel ta pagando 100% mientras cu turismo ta bayendo hopi bon. Anda tin aparentemente hotelnan cu ta pagando 60% so. Algo cu LaSorte ta cuestiona si: ”Ami no sa di un hotel cu no ta pagando 100% actualmente. Enberdad n’e momento aki mester por paga 100%” e ehecutivo di turismo a sigui bisa. 

HOPI EMPLEO

E pensamento tras di e ‘busca otro trabou’ segun LaSorte, ta pasobra tin hopi trabou na Aruba habri. “Tin hopi compania ta buscando hende pa traha, cu ta bay paga bo e salario (di 100%)”, e ta sigura. Y e ta ripiti su declaracion y elabora mas: “ Si, ami ta bisa, si bo ta na un compania cu ta pagando 60%, tin hopi otro trabou habri cu si ta bay paga bo 100%. Bo no tin nodi keda un caminda cu ta pagando bo menos” LaSorte a sigui bisa. 

BO TA CUALIFICA?

Mes momento LaSorte ta bisa si, cu bo mester ta cualifica pa e trabou si. Mundialmente a bin un cambio den e manera cu hende ta mira trabou despues di e pandemia. Tin un cambio awor di ki tipo di trabou hende ta dispuesto pa haci, horario pa traha etc.” Prome cu pamdemia caba, nos tabatin problema den hospitalidad, no ta hotel so. “Tin hopi hende na Aruba cu no kier traha anochi, ni weekend. Esey a sigui y empeora despues di pandemia” e ehecutivo a sigui bisa. Tin hopi trabou cu ta habri segun LaSorte. Hopi ta keha tambe cu nan a aplica pero no a haya e trabou. “Semper mi ta tende esey como contesta”, LaSorte ta bisa. Pero den su defensa, e ta splica si cu bo mester ta cualifica pa e trabou. “Bo mester ta dispuesto pa traha e orario di e trabou. Bo mester tin e personalidad pa e trabou, e actitud corecto, bisti corecto pa e entrevista” e ta sigui bisa, pues no ta sin mas bo ta haya un trabou si e ta disponible. “E ta hopi factor cu ta bay den por tuma un hende pa trabou” LaSorte ta sigui bisa. Realidad ta cu hotelnan (y restaurant) tin problema grandi pa haya hende (cualifica).