Beth Holloway na Aruba pa 10 aniversario desaparicion di su yiu

ORANJESTAD – Conocido presentadora di television mericano Greta van Susteren y su equipo di grabacion pa Fox News, tabata na Aruba durante e siman cu a pasa. Motibo di su bishita, tabata pa graba un ‘special’ riba e di 10 aniversario di desaparicion di Natalee Holloway. Van Susteren no a bin su so, sino hunto cune (aunke no riba e mesun avion) tabatin mama di Natalee, esta Beth Holloway y e abogado. Nan a yega Aruba diabierna y a bolbe Merca diadomingo. Durante e dianan cu a pasa, nan a repasa e momentonan di 10 aña pasa, bishita algun lugar y haci e respectivo entrevistanan.

SUSESO ORIGINAL

Van Susteren tabata un di esnan cu a biba cu e storia ora cu e la sosode 10 aña pasa (na mei) y a keda riba dje pa basta tempo. Un aña despues e la haci un special di 1 ora di ‘e aña despues’. E biaha aki e la opta pa rebiba e storia, y recorda cu ta 10 aña pasa cu esaki a sosode, y e impacto cu e tabatin tanto riba e famia mericano como e isla di Aruba.

HOLLOWAY Y VD SLOOT

Pa loke ta Holloway, e no a haya mucho bon fama na Aruba debi na declaracionan cu e la haci durante su estadia inicial na Aruba. Esaki a haci cu hopi rubiano no por a soporta e persona y a publicamente percura pa laga esaki bira conoci. Mes momento e sospechoso principal di e caso aki, Joran vd Sloot tambe no a keda keto y durante curso di e añanan a hinca su mes den mas problema, y como consecuencia, ta sintando un castigo di prison di hopi aña na Peru, pa asesinato di un dama peruana. Pero pa loke ta e caso di Aruba mes, vd Sloot nunca no a wordo sentencia, aunke e ta keda e sospechoso principal.