Aruba perhudicando Corsou cu asunto di visa pa colombianonan

WILLEMSTAD/ORANJESTAD – Aruba ta strobando Corsou pa keda cla cu e proceso pa elimina e visa pa colombianonan bishita Corsou. Mientras cu varios islanan den Caribe ,-un pa un-, ta eliminando e necesidad pa un visa, ainda paisnan den Reino Hulandes no por keda cla cu e asunto aki. Aruba p.e. ainda no a informa Hulanda formalmente si e kier kita e visa pa colombianonan bishita Aruba. Y asina Aruba ta ‘strobando’ e asunto pa Corsou. NoticiaCla.com (NC) a compronde di premier Eman cu e ta ‘leun’ den direccion pa mantene e visa, pero ‘cu un decision no a wordo tuma’. Y esaki ta algo cu tin Corsou disgusta. Di Corsou, NC a compronde cu ‘informalmente’ Eman a bisa colega prome minister Ivar Asjes, cu Aruba no ta di acuerdo pa kita e visa aki.

CAMARA DI COMERCIO CORSOU

E siman cu a pasa, NoticiaCla.com a compronde di presidente di Camara di Comercio di Corsou Billy Jonkheer, cu e la duna un declaracion riba e tema. “Mi a bisa e siman aki, cu e visa (pa colombianonan) ta stroba turismo y negoshi cu Corsou” Jonkheer a bisa NoticiaCla.com. “Gobierno y sector priva (na Corsou) no kier e visa mas. Si Aruba ke keda cune, ta nan derecho, pero e no mester stroba nos” Jonkheer a sigui bisa.

NELSON NAVARRO

Tabata na januari ultimo cu minister di husticia di Corsou, Nelson Navarro, segun e medio cibernetivo CuracaoChronicle.com, a confirma cu Aruba ta contra terminacion di e necesidad pa colombianonan tin visa pa drenta Corsou. Hulanda tambe lo ta contra pa kita e visa. Pero pa Corsou por haya su peticion aproba, Hulanda mester aproba esaki pasobra ta trata di un asunto di Reino Hulandes. Hulanda (y Aruba) lo tin miedo cu sin visa, specialmente criminalnan (di Colombia) lo por biaha pa Corsou. Corsou di su banda, ta mira e beneficionan economico den turismo, si no mester di visa.

REACCION ARUBA

NoticiaCla.com a acerca tanto minister di asunto di permiso Benny Sevinger y minister presidente Mike Eman riba e asunto. Sevinger no tabata na altura cu ‘tabatin un ultimatum di Hulanda” pa dicidi riba e asunto. Pero e la bisa si cu pa fin di februari, conseho di minister di Aruba lo a tuma un decision y informa Hulanda. Despues a acerca premier Eman, cu a bisa cu tampoco no tabata na altura di un ultimatum, pero cu ta ‘leun’ den direccion pa mantene e situacion ‘status quo’, esta manera cu e ta. Pues pa mantene e visa. Pero cu ningun decision a cay ‘oficialmente’. Mientrastanto ta drentando luna di april, y ningun decision a keda tuma. Y tur esten, islanan den cercania, ta hayando e asunto ‘resolvi’ y pais bisiña Corsou no ta nada contento cu e actitud di Aruba.