Mas di 2000 arubiano a atende Arubadag na Hulanda

RIJSWIJK - Hopi Arubiano di tur skina di Hulanda a bin na Broodfabriek van Rijswijk pa celebra aki na Hulanda nan Dia Nacional. Segun informacion cu NoticiaCla.com a ricibi, tabatin riba 2000 persona, cu segun e directora di gabinete di Aruba, Shandra John a bisa NoticiaCla.com, ta loke cu nan a plania, pues nan ta contento. MC Ruben Garcia a yama e publico presente bon bini y a pidi atencion pa nos himno nacional Aruba Dushi Tera, canta pa e hoben Mitchell Tromp.

DISCURSO JOHN

Despues John, den nomber di Gobierno di Aruba y e Comision Arubadag a yama tur hende bon bini. "Despues di lunanan di preparacion nos por brinda bosonan un programa hopi varia cu presentacion di diferente artistanan tanto local como for di Aruba. Aparte di diferente baile, musica y cultura boso por disfruta di e diferente standnan cu cuminda y cosnan dushi tipico Arubiano", John a bisa.

PROGRAMA

E programa a sigui cu presentacion di Xanadu Dancers, un grupo di baile di hobennan Arubiano, residencia na Hulanda y bou di guia di Tamara Angela. E agrupacion K'Ribe cu ta conta cu integrantenan manera John Francis Jacobs, Mitchell Tromp y Reinwald Geerman a deleita e publico cu un variacion musical, di Kizomba, Merengue te cu Salsa y Zouk. E agrupacion popular for di Aruba Tsunami e duna e publico na Arubadag exactamente loke nan a bin pe. Un presentacion di tur nan hitnan cu nan ta conoci pa nan, tambe bou di nos hendenan na Hulanda. Cada cancion tabata pone e hendenan grita pa mas musica.

Despues di e presentacion e publico a bai cas satisfecho y contento cu un biaha mas nan a celebra nan dia nacional en grande na Hulanda.

SOLAMENTE UN BANDA

Riba e hecho cu tabatin solamente un banda di Aruba e biaha aki, John a bisa cu “Arubadag Commissie ta busca semper un grupo”. Segun John, ora cu mas grupo bin, ta pa medio di sponsor cu ta cubri esaki. Den e caso aki, John a felicita Tsunami cu riba nan mes activamente a busca sponsor pa haci nan presentacion na Hulanda, hunto cu e comision, un exito.