Atrobe nubia scur riba futuro di operacion di refineria na Corsou

WILLEMSTAD - Sindikatonan ku ta representá trahadónan di refineria ayera a entregá karta na tantu promé minister Gilmar Pisas komo tambe presidente di parlamento sra. Charetti America-Francisca un karta kaminda nan ta trese nan preokupashon dilanti pa ku re-apertura di refineria.

Ta inisiá nan karta indikando kon importante refineria ta pa nos isla, i pa mas di 100 aña a kontribuí engrande ku komunidat. Ademas e refineria a pone Kòrsou riba mapa mundial, prinsipalmente den Caribe.

Ta for di 2013 a kuminsá buska operador nobo pa refineria, pero niun dje intentonan a kristalisá te awe. Sinembargo for di 2020 hopi trahadó direkto i indirekto na refineria a kuminsá pèrdè trabou.

Sèptèmber 2021, e gobièrnu aktual a instituí un tim nobo PMO ku ta konsistí di 4 persona, 2 miembro nombra pa gobièrnu i 2 miembro nombra pa RdK (Refineria di Kòrsou). E tim a haña tarea pa kuminsá “head hunting” pa yega na un posibel operadó pa refineria mas lihé posibel. E “head hunting” no a bai segun deseo di e gobièrnu aktual i a sigui traha den direkshon di un kandidato ku ta interesá den refineria.

Segun e sindikatonan aktualmente tin 3 kompania ku a pasa den henter e proseso i a ser evaluá basá riba kriterionan establesé pa yega na e mihó kandidato. PMO a finalisá su trabou i a hasi su eskoho konforme tur kriteria i eksigensianan di e proseso.

Sinembargo, awor e sindikatonan ta komprondé ku a surgi un impase entre Raad van Commisaris di RdK i PMO. Konsekuensia ta ku e impase aki por yega na opstakulisá e desishon final, kual lo pone ku e anunsio pa e “prefer bidder” lo kai mas atras. Esaki ta pone ku entrega di yabi na e operador nobo tambe lo keda posponé.

P’esei e sindikatonan APRI, PWFC, SGTK, Koperativa C.E.P.C., Grupo-6 i organisashon di penshonadonan ASPERI, den fin di siman a reuní, i a keda sorprendí i preokupá ku e informashonnan ku a yega na nan konosementu.

P’esei nan ta puntra nan mes si: gobièrnu tabata informá nan mes durante progreso di e trabounan di PMO; e proseso a kana segun regla/òf leinan establesé pa gobièrnu i RdK, e trabou ku PMO a hasi ku sr. Mensche na kabes ta karesé di informashon, gobièrnu tin duda den e trabou ku PMO bou di guia di RdK a hasi?. RvC ta duda den ekspertisio i konosementu di e tim di PMO, gobièrnu ta dispone di situashon penoso di èks-trahadó, trahadó direkto i indirekto di refineria, ta hustu ku ta te na final di e proseso aki ta bini ku duda riba e trabounan ekstenso ku a keda hasí dor di PMO ku a ser instituí pa gobièrnu mes?, ta e preguntanan ku e sindikatonan a lansa den nan karta na gobièrnu.

E sindikatonan ta konkluí ku nan no ta permití trabou di e tim di PMO kambia riba un desishon adhoc sin argumentonan válido; Nan ta sostené desishon di PMO; sindikatonan ta urgi gobièrnu pa tuma desishon final i anunsiá e “prefer bidder” pa mas tarda 1e yüli 2022 i finalmente pa gobièrnu tuma paso korektivo pa evitá ku den futuro serkano lo por tin estorbo den negosiashonnan ku e “prefer bidder”. NOTA:  E texto ta scirbi den Papiamento fonetico di Corsou.