Corte: Decision pa kita poder di Kathy Paskel na Dimas ta ilegal

ORANJESTAD – Hues a revoca e decision di minster Glenbert Croes pa kita poder di director di DIMAS, Kathy Paskel dialuna den un sentencia cu e director a entama contra e mandatario. En corto, hues a considera e decision di e minister como ilegal, y tuma simplemente pa motibo di falta di confiansa y ta viola asina e structura hirargico di e sistema na Dimas. Como tal, cu e sentencia aki, Paskel ta haya tur poder bek na Dimas manera cu e tabatin prome cu e decision tuma pa minister na maart ultimo.

CASO

Mester bisa cu den e evaluacion di e hues, e la baha basta pisa riba e defensa di gobierno (lesa: Minister Glenbert Croes), for di comienso caba. Esaki pasobra gobierno kier a argumenta cu e hues no tin e autoridad pa mete den un decision asina debi na e contenido di esaki. Hues a contradeci esaki, argumentando cu e decision di e minister ta atacha e posicion huridico di e director directamente, cu ta duna e hues den e caso aki tur derecho pa tuma nota y actua den e caso aki. Ademas, e decision di e minister pa pone Paskel un banda, ta basa riba e hecho cu e no tin confiansa den dje mas. Y e decision di e minister ta pone cu e e director no por eherce su funcion mas y ta wordo poni asina ‘na banda’. Tambe hues ta mustra cu gobierno ta faya den mustra base legal pa cual e decision ta tuma, pues e decision no tin peso aki. Tambe, hues ta mustra fayo den e forma con a actua contra Paskel, door di cambia e structura di tal forma cu solamente ‘pa nomber’ e ta keda director, pero cu tur decision tin cu pasa via un otro structura di management team, cu ta viola e regla hirargico di e funcion, conforme ley. Y como tal e ta actua awor pa preveni e deseventaha cu Paskel ta haye aden aworaki. Y finalmente, hues ta mustra cu debidamente ta trata di un caso urgente, pa cual e caso aki mester wordo trata. E argumento di gobierno cu no ta algo ‘urgente’ pasobra Paskel toch ta keda cu su salario completo, no ta valido. Esaki pasobra segun hues, e asunto ta bay mas leu cu ‘djis salario’. Segun hues, Paskel mester por eherce su trabou pa cual e ta apunta y pe, cu ta resorta tambe como un asunto ‘urgente’. Debi na tur e fayonan aki di gobierno, (lesa: Minister Glenbert Croes),  hues ta suspende e decision di minister, te ora cu e caso wordo trata den profundidad (bodemprocedure), aunke e chens pa gobierno gana esaki eynan, ta minimo, mirando cu e decision cu gobierno a tuma contra Paskel, ta ilegal. Por lesa e sentencia completo AKI.