Minister Alex Schwengle ta boga pa union pa progreso di deporte

ORANJESTAD - Minister Alex Schwengle ta boga pa union pa progreso di deporte. Den presencia di representantenan di F.F.D, A.S.U, Lifida, C.O.A y Lotto di Aruba, Jose “Buchi” Panama y otro lidernan den e ramo di deporte, a tuma luga siman pasa traspaso di e veld di Yara. Ta trata aki di un veld di futbol cu a wordo renoba y poni bek na uzo y disponibel na e comunidad di Savaneta y bicindario, pero tambe futbolista y teamnan di otro bario.

TRASPASO

Schwengle ta hopi contento cu e desaroyo positivo aki, no solamente como e mandatario encarga cu deporte, pero como un persona procedente di Savaneta. El a expresa cu e traspaso a marca un dia grandi pa deporte y algo hopi bunita pa su bario di Savaneta cu semper a destaca den deporte y ta stima deporte.

DESAROYA VELD

A traha duro riba e veld, tin algun idea con pa sigui desaroy’e y awo ta sigui e proceso pa combersa cu e teamnan di Savaneta pa mira kico ta nan deseonan. E mandatario a gradici Lotto di Aruba pa e empeño pa traha duro pa hiba deporte dilanti. El a expresa cu e ta spera cu e fondonan cu ta ricibi for di Lotto sigui aumenta y a menciona e deseo pa esaki bira cinco miyon den futuro cercano.

ORGUYO

“Nos por garantisa boso cu cada florin cu wordo produci extra na Lotto di Aruba ta bon uza den deporte via di subsidie commissie, cu ta birando un fundacion”, asina Minister Schwengle a subraya. El a encurasha un miho organisacion di deporte, unda cu ta pone orguyo un banda pa habri porta pa colaboracion y asina uza cada florin optimalmente y den un forma mas responsabel posibel.

RIVALIDAD

E Minister a expresa cu el a nota esaki den funcionamento den e districto di Noord, unda cu dos ekipo rival a dicidi di traha hunto den cierto areanan pa haci uzo maximo, mas efectivo y mas eficiente di e fondonan disponibel. Minister Schwengle a menciona tambe e importancia di “duna cuenta”, unda cu transparencia y eficiencia di parti di Gobierno y di tur organisacion deportivo ta masha importancia. Cada un persona y ekipo envolvi mester duna di nan mes.

FIFA

“Orguyo ta parti di educacion di cualkier Arubano, pero e no mester ta na prome luga pasobra e ora e ta bira un desbentaha. FIFA ta duna ehempel con trahamento hunto tin hopi mas potencial y tambe ta conseha pa tin mas cooperacion y asina ta haci e teamnan mas fuerte”, Minister Schwengle a bisa.

TRAHA HUNTO

Pa un populacion di 108 mil hende, Aruba tin hopi team y traha hunto y comparti gasto ta unda cu ta saca mas probecho di e placa cu tin disponibel, e mandatario a agrega. Minister Schwengle a remarca cu manera tin stadion p’abao di brug, su deseo ta pa tin un stadion p’ariba di brug tambe den comunidad di Savaneta.