Estudio Bounce: Aruba ta e pais cu mas ta depende di turismo na mundo

MIAMI – Aruba, segun un estudio di e compania Bounce, ta e pais cu mas ta depende di turismo. Asina e portal traveldailymedia  ta raporta awe. E noticia aki no ta nobo, pero si aworaki comproba cu cifras. E estudio ta analisa paisnan cu di cual e GDP ta bin mas tanto di placa di turismo, y tambe esnan cu ta ricibi mas placa di bishitantenan. Aki Aruba ta number 1, sigui pa Virgin Islands, Maldivas, Seychelles, Bahamas, St Lucia, Cabo Verde, Vanuatu, Malta y Belize na number 10. 

ARUBA

Aruba su turismo ta contribui 27.64% na e GDP di Aruba, y 29.91% ta emplea pa turismo, cu ta bon pa 28.77% di e economia, segun e cifranan cu nan ta produci. Noticiacla no a verifica e cifranan aki cu autoridad local di turismo, pa mira si esaki enverdad ta cuadra. Pero esaki ta loke e portal traveldailymedia ta raporta. Mayoria di e paisnan cu ta den e lista, manera Aruba, ta popular debi na e clima, shelo cla cu solo, henter aña.