Glenbert Croes kier Obama anula decreto contra Venezuela

ORANJESTAD – Parlamentario pa partido MEP, Glenbert Croes kier pa e decreto emiti pa presidente mericano Barack Obama contra Venezuela, wordo anula. Esaki e la bisa diasabra durante e ‘protesta’ di venezolanonan residencia na Aruba, na consulado venezolano. Como parti di e protesta mundial venezolano, Consulado di Venezuela tambe a participa na esaki aki na Aruba.

MERCA MESTER ANULA DECRETO

Segun Croes, ‘e decreto ta ‘totalmente infunda y nos ta kere cu e mester wordo revoca, pasobra Venezuela no ta menasa pa ningun hende”. ‘E recoleccion di firma, -manera a sosode tambe na Aruba den fin di siman-, ta trece un mensahe, y esaki ta uno di respeto mutuo ‘unda ta reina paz. Mientras paz ta presente, nos tur ta hunto’. Ademas, segun e parlamentario, ‘cualkier intento cu ta ataca un pueblo ruman manera Venezuela, no ta afecta solamente Venezuela. E ta afecta Latino America y Caribe’ Croes a sigui bisa. Pa Croes, ‘ Aruba ta un pueblo cu ta biba di paz entre nos pueblonan ruman. Y hopi respetuosamente nos ta pidi Merca pa anula e decreto” Croes a finalisa bisando.

SOLIDARIDAD

Croes su presencia tabata pa demostra su solidaridad cu e ciudadanonan venezolano cu ta contra e decision di presidente mericano Barack Obama, cu a bisa cu e situacion di Venezuela actual ta un menasa pa seguridad nacional di e pais mericano. Algo cu a cay na mal smak na Venezuela. Y como tal mundialmente, Venezuela a mustra su malcontento den fin di siman, incluyendo Aruba.