Port of Amsterdam lo yuda desaroya waf di Oranjestad

ORANJESTAD –Gobierno di Aruba a firma un Memorandum of Understanding cu ta habri caminda acceso di conocemento cu por ta di vital importancia pa desaroyo di waf di Oranjestad y henter nos isla. E acuerdo di cooperacion a wordo cera cu Port of Amsterdam y ta e resultado di un proceso cu a inicia algun tempo atras pa medio di minister plenipotenciario na Hulanda Alfonso Boekhoudt. Prome minister Mike Eman a firma e documento hunto cu minister Mike de Meza y CEO di Port of Amsterdam, Dertje Meijer.

FIRMAMENTO

firmamento di e mou tabata compaña pa un presentacion cu e organisacion hulandes a haci pa e mandatarionan, secretaria di conseho di minister Nicole Hoevertsz, president di Atia Michel Henriquez, director di Freezone Aruba Greg Peterson y director di directie scheepvaart Carlyle de Coteau. E delegacion di Hulanda tambe a conta cu Gert-jan Nieuwenhuizen como director of International Projects. E mou ta laga espacio pa e cooperacion por enfoca tambe riba otro terenonan cu por ta di hopi beneficio pa nos pais. Prome minister Mike Eman a bisa cu port of amsterdam tambe por tin un aporte na loke ta e operacion y maneho di e waf di barcadera, ademas di studia e posibilidad cu ta habriendo den e area di refineria y e waf cu tin eynan.