A pidi reconteo di voto di eleccion na Bonaire

KRALENDIJK - Partido Demokratico Boneriano y Lista Soleana a pidi un reconteo di tur voto di e eleccion di diaranson ultimo. Esaki a keda confirma awe nochi durante un conferencia di prensa di e conseho electoral di Bonaire. A dicidi pa yama un reunion publico durante cual lo haci e conteo general atrobe.

MOTIBO DI RECONTEO

Motibo duna durante e conferencia di awe nochi, ta cu entre otro e proceso di conteo no a bay mescos na tur urna, y ta cuestiona e declaracionnan di e votonan invalido (cu ta 200 mas of menos). En general e conteo no tabatin mayor problema, sino mas bien aki aya algun diferencia entre e proceso telefonico di entrega e resultado, y e procesverbaalnan traha. Como tal esaki a resulta den un diferencia di voto entre e dos partidonan mas grandi MPB y PDB di 4 voto. Inicialmente e diferencia total di voto tabata 33, pero finalmente esaki a bira aun mas chikito, y awor ta 29.

REUNION PUBLICO

Mirando e diferencia hopi minimo di voto entre partido, y e otro kehonan oficial entrega pa e dos partidonan menciona, a dicidi di suspende e encuentro di awe nochi, y a dicidi cu ta yama un reunion publico pa e reconteo total por tuma lugar.

RESULTADO ELECCION

Diaranson ultimo Partido MPB (Movimento Pueblo Boneriano) a gana eleccion na Bonaire cu 2751 voto, cu ta 33 voto mas cu e siguiente partido, Partido Demokratico Boneriano. Y partido UPB a keda na di tres lugar cu 2289 voto. Sinembargo e reparticion di voto ta keda igual na 3. Esta UPB 3, MPB 3, y PDB 3. Bonaire lo tin un coalicion, pero no ta conoci ainda cua partido lo forma parti di esaki. E lider di e partido Elvis Tjin-A-Sjoe ta bira e lider di partido cu ta gana e eleccion den apenas su prome salida. Un eleccion cu tabata hopi serca pa gran parti di e anochi.

PROME COMENTARIO DI TJIN-A-SJOE

Prome comentario di Elvis Tjin-Asjoe na NOSTV, -cu Aymed Ayub-i, ta cu e no ta bay forma coalicion cu partido UPB, ya cu e la priminti su votadornan esaki durante campaña. E no ta kita afo cu otro partidonan lo por sera cabez y lague afo. Pero e no ta spera cu esaki lo sosode.  Pa e resultado completo mira aki.