Mas di 130 ciclista a participa den e Ride of Silence na Aruba

ORANJESTAD – Algo mas di 130 ciclista di varios grupo di ciclista y tambe esnan individual na Aruba diaranson atardi a participa na e ‘Ride of Silence’, cu ta un corida silencioso di bicicleta pa recorda ciclistanan cu a fayece of y keda herida a consecuencia di un accidente di trafico cu nan bicicleta riba caminda publico. Esaki ta e di 20 biaha cu tal careda ta tuma lugar, cu excepcion di e ultimo 2 añanan debi na e pandemia. E grupo a topa dilanti Plaza Libertador y a subi caminda y usa un ruta publico di 2 kilometer cu a hiba nan e.o den Vondellaan, Wilhelminastraat, LG Smith Boulevard unda cu nan a tene un minuto di silencio na memoria di e cicilistanan cu a fayece tragicamente. Despues a sigui core riba LG Smith Blv, bira na Wendys y sigui nan ruta y bolbe unda cu nan a cuminsa, esta dilanti di Plaza Libertador Betico Croes. E ruta no tabata largo, pero e cantidad di ciclista cu a uni, tabata impresionante. Hopi di e ekiponan di ciclista a bin den nan uniforma, y a mustra un colegialidad increibel manera semper, hunto cu esnan cu no ta pertenece na un club y tambe kier a participa. E tabata un bon momento Deportivo, pa mustra con cos por bay den harmonia. Na final a topa cu e cicilista cu a acidenta algun aña atras (2017), Rechenell Statie, ora cu un auto a dal e durante cu e tabata entrena riba cu bicicleta den Colony. E la keda den rolstoel y ta den proceso di rehabilitacion. 

RIDE OF SILENCE

E prome Ride of Silence tabata na 2003 na Dallas, Texas na Merca, ora cu e ciclista Larry Schwartz a keda alcansa pa spiel di un auto cu tabata pase y a fayece. Esaki a bira algu mundial mientrastanto. E ta un corida gratis, cu ta pidi ciclista pa no core mas duro cu 12 miya pa ora, bisti helm y sigui regla di trafico y keda keto durante e corida. No ta registra y paga pa e cori aki, y mester sirbi netamente pa crea concientisacion di automobilistanan riba caminda pa cu e ciclista.