Ministerio Publico a laga e curpa di victima di caso di Hooiberg liber

ORANJESTAD – Ministerio Publico a laga e curpa di e victima di asesinato na Hooiberg, den libertad awe tardi laat y entrega esaki na e famia. Vocero di ministerio Publico Ann Angela a confirma esaki pa NoticiaCla.com. No ta conoci si kico e resultado di e autopsia tabata. Mientrastanto e investigacion ta continua di e caso aki, cu ainda tin hopi pregunta.

KICO A SOSODE

Manera cu NoticiaCla.com a raporta, algo despues di mei anochi a haya un curpa sin bida, den un plas di sanger den un auto blanco na altura di Hooiberg. A identifica e persona como Lyandro ‘Lalo’ Webb (23). Despues cu docter a constata e morto, Ministerio Publico a tuma e curpa den beslag pa haci autopsia. Esaki mester a determina e causa di morto y tambe con esaki a sosode.

HISTORIA

Manera a raporta tambe, ta trata di un caso cu tin un ‘historia’ y cu parti di e historia aki a yega na su fin. E victima ya caba tabata un blanco di un intento di asesinato durante periodo di carnaval, pero esnan cu a haci esaki, no a logra nan meta. E meta sinembargo awor si a wordo logra.

Mientrastanto e peticion ta keda di parti di ministerio publico, pa raporta cualkier informacion cu por yuda resolve e caso aki mas liher. E number pa yama, ta 11141.