WILLEMSTAD - E ekipo kampion di futbòl hulandes, Ajax, ta riba nos isla, pa asina trese un siman ku vários aktividat sosial pa nos komunidat. Gran parti di e delegashon di Ajax a yega den oranan di ayera tardi ku vários di e nòmbernan konosí di pasado i presente. Tabatin por ehèmpel Edwin van der Sar èks kiper di Ajax, Juventus i Manchester United. Van der Sar awor aki ta un ehekutivo di e ekipo. Tambe por a mira dos èks defensa di Ajax ku ta Micheal Reiziger i Winston Bogarde den e delegashon. Tur dos awor ta parti di e staf tékniko. I pa loke ta trata e hungadónan ku tambe a yega tabatin Dusan Tadic, kapitan di Ajax i alabes kapitan di selekshon di Serbia, Ryan Gravenberg un di mediokampistanan mas talentoso di Hulanda, Brian Brobbey delantero hóben, Nicolas Tagliafico hungadó di Ajax i tambe miembro di selekshon di Argentina. I huntu ku nan a yega e gran Jurriën Timber ku tin rais di Kòrsou.
Mas despues anochi durante rueda di prensa Jurriën a bisa di ta kontentu di ta bèk riba e pais ku su mama a nanse. Normal e ta bini ku vakashon pero e ta hañ’é bon pa por tei awor aki ku su ekipo i kompañeronan di ekipo. Lo ta algu bunita pa e abitantenan i sigur pa e muchanan pa por eksperensiá tur loke Ajax lo hasi den e siman aki na Kòrsou asina Timber a bisa. Nan ta bini pa duna Kòrsou un dushi siman e defensa di 20 aña a bisa.
Mañan durante dia Ajax lo bai tin klínika na Stadion Ergilio Hato. Lo bai tin 400 mucha ku durante dia lo forma parti di e klínikanan aki. Tabatin 1300 aplikashon pero pa motibu di limitashon por a yega te 400 mucha. Tambe Ajax lo bishitá Cruyff Court Foundation kaminda muchanan di den besindario lo por sera konosí ku e hungadónan di Ajax. NOTA: E texto ta scirbi den Papiamento fonetico di Corsou.
WILLEMSTAD - Ultimo añanan tras di lomba a traha duru riba kòntraktnan nobo pa e unidatnan aéreo pa Wardakosta Karibe Hulandes. Meta di a sera e kòntraktnan aki ta un provedor di servisio konfiabel pa Wardakosta i unidatnan aéreo moderno, ekipá ku hèrmèntnan teknológiko ku ta yuda den ehekushon di e tareanan di Wardakosta.
WILLEMSTAD - Apesar ku asuntu di refugiado ta keda un responsabilidat outónomo di kada pais den Reino, gobièrnu Hulandes ta dispuesto pa yuda Kòrsou, Aruba i St. Maarten ku ayudo tékniko den kaso ku pidi pa esaki. Gobièrnu Hulandes ta enfatisá sinembargo ku ta importante ku ta habri diálogo ku organisashonnan no gubernamental pa optimalisá kolaborashon.
WILLEMSTAD - Diesocho instituto di enseñansa i konosementu di e parti karibense di Reino i Hulanda ta bai sigui strukturá i intensivá nan koperashon riba tereno di enseñansa, investigashon i siensia. Asina por ehèmpel nan kier bai desaroyá entre otro programanan di enseñansa konhuntamente. E kolaborashon speshal ta resultado di e mishon di konosementu den e área karibense bou di liderazgo di minister Dijkgraaf (Enseñansa, Kultura i Siensia). Djabièrnè último a klousurá esei na Kòrsou.
WILLEMSTAD - E frakshon di MFK ta hopi preokupá ku kasnan ku no tin suministro ainda di awa. P’esei nan ke un reunion públiko, kaminda ta invitá minister Ruthmilda Larmonie-Cecilia i su kolega minister Ruisandro Cijnte pa ta den sala di parlamento i asina debatí ku nan riba e tópiko aki.
WILLEMSTAD. – E akusado V.V. (33) nasé na Aruba su kaso a keda tratá den su ousensia. Segun akusashon dia 21 di febrüari último, el a trata na eksportá 1.535 gram di mariwana.
WILLEMSTAD - Ministernan di Enseñansa Robbert Dijkgraaf (Hulanda) i Sithree van Heydoorn (Kòrsou) den presensia di minister di Edukashon di Aruba, Endy Croes a firma ayera un akuerdo pa instituí e beka Tula. Pa medio di e beka aki un studiante di Kòrsou por hasi un estudio di historia na Hulanda na nivel di “bachelor”.