Gobernador a bandona oficina merdia sin noticia

ORANJESTAD -  Gobernador Freddis Refunjol a bandona su oficina dialuna merdia, sin cu tin informacion riba su desicion pa firma e presupuesto si of no. Por lo menos, sin cu e la participa su desicion publicamente. Tur atencion dialuna mainta tabata riba e desicion di gobernador Refunjol. Unda cu bira, e pregunta tabata si e la firma, y mas importante, kico e la firma. Pero tin cu warda un poco mas, y sigur despues di merdia, ora cu gobernador bolbe su despacho. Di otro banda, NoticiaCla no por a confirma si ta un reunion tin cu tuma lugar entre premier Mike Eman y gobernador Refunjol, of si ta di otro firma nan lo informa otro riba su desicion. 

Manera cu NoticiaCla a raporta mainta caba, henter fin di siman cu a pasa, e pregunta miyonario di pueblo, tabata “Bo ta kere cu gobernador ta firma presupuesto dialuna?”. Un trahado ta puntra otro trahado den un tienda na playa. Esey a caracterisa e topico di e fin di siman aki. Tur bista ta riba gabinete di gobernador awe dialuna y mas specifico, si gobernador lo firma e presupuesto e biaha aki of no. “Ami kier wak si e presupuesto ta wordo firma pa e gobernador” un trahado di un supermercado na Playa a comenta na otro. Otro tabata comenta den un restaurant. “Lo ta cu e ta firma of no?” Y asina NoticiaCla tabata haya notificacion di mas cu a tende comentarionan riba e tema aki.

Di canalnan oficial, NoticiaCla a compronde cu tin varios scenario posibel pa gobernador. 1. Firma presupuesto, y termina e crisis completo. 2.f firma e presupuesto pero mare na un cantidad di condicion pisa (entre otro cu CFT ta encarga su mes cu presupuesto 2015). 3. No firma e presupuesto, sino mas bien duna indicacion simplemente kico e status di e trabounan di investigacion ta. Un cos NoticiaCla a haya confirma, cu e KB ta vigente ainda te proximo aviso. E ta vigente te ora cu e investigacion completo por demostra cu tin suficiente informacion pa determina cu e presupuesto por wordo firma of no. Segun e KB su contenido, ta basta cos tin cu sosode prome cu gobernador por dicidi pa firma esaki. Pero mirando cu tin un quickscan awor, e por cambia e panorama un poco. Tambe NoticiaCla a compronde cu contrario na pensamento, lo no tin un ‘reunion’ entre premier Mike Eman y gobernador, unda cu e uno lo splica na e otro kico ta kico. Por lo menos, esey ta e informacion. Cosnan den politica por cambia di ultimo ora, manera cu tabata e caso ultimo dos simannan.

E presupuesto tin hopi cos wanta. Entre otro pagonan na contratista, proyectonan y mas segun minister Benny Sevinger a splica NoticiaCla. Studiantenan cu tin cu biaha proximamente, Cu un presupuesto no aproba, pagonan di otro asuntonan di gobierno tambe ta pega, segun un otro minister a splica NoticiaCla. Fondonan pa turismo, aunke no hopi, tambe ta sufriendo. Pues ta pertinente pa e presupuesto keda firma pa cos por sigui draai. Nota: e foto di gobernador saliendo di oficina ta uno di file. NoticiaCla sinembargo tabata testigo cu gobernador a bandona su oficina acompanja pa su adjudante dialuna merdia.