OM: Buscando alternativa scucha prueba cu periodista Van Susteren tin cu caso Holloway

ORANJESTAD - Ministerio Publico ta bezig ta wak  alternativa pa asina por scucha ki prueba periodista Mericano Greta Van Susteren tin riba e caso Natalee Holloway, manera cu e periodista a bin ta bisa e siman aki. Diamars OM a saca un comunicado riba e tema, pa trece clarificacion riba nan ‘rol’ den esaki. Segun Ministerio Publico,  dialuna 9 di mei ultimo a sali un relato den media cu e periodista Greta van Susteren lo ta dispone di prueba importante dor di cual e caso di Natalee Holloway por wordo soluciona. 

Ministerio Publico a wordo informa riba 6 di mei ultimo tocante un overleg entre sr. Richardson, alto comisario anterior di Polis di Aruba, y mama di Natalee Holloway, y siguientemente cu sra. Van Susteren. E overleg aki a tuma lugar riba 22 di maart ultimo. Sra. Van Susteren a bisa durante e overleg aki cu e ta dispone di informacion nobo cu lo soluciona e caso Holloway. Tambe el a bisa cu e no kier wordo scucha door di Recherche. 

Ministerio Publico ta bezig ta wak awor alternativa pa asina e storia di sra. Van Susteren por wordo scucha. Te cu ta asina leu Ministerio Publico lo no duna mas informacion tocante e cuestion aki.