WASHINGTON – “E pruebanan cu mi tin ta multiple e increible. Hopi cabez lo cay” tabata palabra di e periodista y abogado Greta van Susteren na Noticiacla diamars atardi. E ta referi na pruebanan cu posiblemente por ‘soluciona’ e caso di desaparicion di Natalee Holloway. “Mi tin noticia. Y e lo ta problematico pa hopi, incluyendo boso prome minister (Evelyn Wever) Croes”, e la sigui bisa. “ MI a ofrece pa dun’e y e la bisa cu e tabata hopi interesa den dje y tabata kier e. Pero despues e la cuminsa bula pipa, indicando cu Ucrania tabata tene hopi ocupa” van Susteren a sigui bisa. "Mi no ta compronde pakico e ta sconde. Porta mi sa pakico. e prueba ta hopi iy increibel". Kico e informacion ta, van Susteren no a bisa y no ta conoci si esaki ta un triki pa haya publicidad, of si esaki ta algo real.
OM
Segun van Susteren, Ministerio Publico (OM) nunca no a yame, mientras cu e la ofrece pa duna nan tur informacion. Pero cu un condicion, cu ta pa nan tope den un oficina di FBI na Florida, pasobra a menase cu morto. Van Susteren ta sigura cu e la papia cu e representante di Interpol na Aruba, ex comisario Dolfi Richardson y cu e lo a duna OM e telefon di van Susteren. Pero te awor, esaki no a sosode.
PROGRAMA
Manera ta conoci, for di momento cu e storia a nace na Aruba for di 2005, prensa Mericano a tuma interes den dje y un di e periodista/abogadonan cu for di inicio a tuma esaki como algo grandi, ta e mesun Greta van Susteren. Anteriormente trahando cu Fox e tempo ey, e tabata dedica programanan completo na e tema, y a sigui e storia pa añanan largo y a bishita nos isla varios biaha y bin cu e mama di Natalee Holloway pa atende cu e tema. E no ta cu Fox mas pero awor tin un otro programa y cu esaki e ta sigui e tema ainda di cerca. Segun vasn Susteren, e la haci promesa na e mama cu e lo no descansa te ora cu e caso ta resolvi.
TEHERAN – Mientras cu tin informacion cu Israël a ataca Iran durante diabierna marduga, tur dos pais ta keto riba e atake aki. Iran ta bisa cu e la saca algun drone di Israël for di shelo, pero ta desmenti cu tabatin un atake di raket. Algo cu prensa Mericano si ta raporta. Iran no ta yama Israël como e culpable tampoco, dus tin hopi incertidumbre riba e atake aki. Recientemente Iran a haci un atake specifico y calcula riba Israël, y despues Israël a keda keto. Esaki ta un noticia den proceso.
ORANJESTAD/SANTO DOMINGO – Un cantidad grandi di Dominicano bibando ‘ilegamente’ na Aruba, a bolbe nan pais boluntariamente. Asina e portal El Nacional a raporta diamars. Na tur, ta trata di mas di 4.300 dominicano cu tabata residencia e.o. na Aruba, cu a bolbe nan pais bek den e ultimo 15 lunanan. E portal ta cita datonan ‘estadistica’ obteni di e aeropuerto di Las Americas. Fuera di Aruba, nan tabata ubica na e.o. Panamaá, Venezuela, Colombia, Mexico, Argentina, Chile, Honduras, Corsou, Spaña, Francia, Italia y Alemania. “Mas di 60% di e Dominicanonan aki ta muhernan”, e portal ta sigui bisa. E Dominicanonan cu a bolbe tabata haci trabou domestico, restaurant, beautysalon, y den centronan nocturno. “Nan tabata biba ilegalmente, soportando e persecucion di autoridad”. E hombernan tabata traha den agricultura, construccion, panaderia y otro tipo di negoshi”. Hopi di nan tabata biba entre 5 pa 6 aña bibando illegal, y a dicidi di bolbe boluntariamente. Pa nan por a bolbe, mester a haya sosten economico di nan famia na Republica Dominicano, y incluso e consuladonan cu ta representa e crioyonan na e paisnan aki” e portal ta sigui bisa. Un dato interesante ta bisa cu mas di 200 Dominicano a bolbe e aki caba (2024) y mayoria tabata di Panama, Venezuela y Corsou. NOTA: Noticiacla independientemente no por a verifica e informacion aki adkeri di e portal en cuestion.
CARACAS – Presidente Venezolano Nicolas Maduro a sigura dialuna cu Venezuela ta sigui su marcha economico cu of sin licensia Mericano cu ta aproba un alivio di sanccion riba e petroleo Venezolano. Dialuna gobierno Mericano a dicidi cu no ta extende e validez di e alivio cu ta vence diahuebs awor. “Nos ta sigui, cu of sin licencia, nos no t aun colonia Mericano. Nada lo para nos, señores Mericano” e presidente a bisa. Segun Maduro, presidente Mericano Biden ta sigui chantagea cu menasa cu e ta bay kita e licensia cu e la permiti na Caracas pa comercialisa sin problema, e crudo den e ultimo 6 luna.
OLIMPIA – E flambeu olimpico pa e proximo weganan na Paris den zomer, a wordo cendi. Esaki a sosode diamars mainta di forma tradicional den e ciudad bieu Olympia na Grecia, unda cu 776 prome cu Cristo, e prome weganan olimpico a tuma lugar. Durante e ultimo edicion, no tabatin publico debi na e menasa di Covid. E biaha aki esey tabata diferente.
NEW YORK – Seleccion di hurado pa e caso penal contra ex presidente Mericano Donald Trump a cuminsa dialuna mainta na New York. Esaki ta bira un caso historico siendo e prome caso penal contra un ex presidente di Merca. Trump ta den corte pa pagamento di placa na un actriz di pelicula porno, pa e keda keto. Cu esaki e kier a evita un escandalo sexual na caminda pa e eleccion presidencial di 2016 cu e la gana. Tin un total di 34 keho contra Trump, cu si wordo haya culpable, por haya 4 aña di castigo di prizon.
ORANJESTAD – Mientras cu na Aruba ta pendiente pa e sentencia di Corte di Casacion riba matrimonio di mesun sexo, y e hecho cu otro luna Parlamento ta trata e ley mes, ya tin portalnan internacional cu ta propaga cu matrimonio di mesun sexo ta legal na Aruba. Noticiacla a wordo informa pa personanan conoci cu e tema riba e noticia di e portal aki, riba e informacion aki, cu ta confuso y por crea malinformacion pa nos isla. Ademas, e notificacion ta sali di un raportahe di un portal conoci den e mundo aki di LGBTQ+, unda cu Aruba ta figura den e top 9 destinacionan den Caribe mas pro LGBTQ+. Ta den e raportahe aki, ta informa eroneamente cu matrimonio di pareha di mesun sexo ta legal. Ademas tin e biblioteca ‘cybernetico’ Wikipedia, tambe ta raporta cu desde 2022, matrimonio di mesun sexo ta legal na Aruba.