Tardansa den trata e caso asesinato di Poentje Castro, por tin influencia riba e castigo

ORANJESTAD – Dia 24 di mei proximo hues ta dicta sentencia den e caso Apollo cu a  tuma lugar awe mainta. E tratamento di e caso inicialmente a cuminsa awe mainta 8.30 y a sigui te den oranan di atardi. Fiscal a acusa A. Rasmijn (36) di Colombia biba na Aruba, di a tira mata premedita John (Poentje) Castro riba 22 December 2010. Segun fiscal, Rasmijn a tira Poentje Castro den pecho y cabez, cu consecuencia cu el a fayece. Tambe Fiscal ta acusa Rasmijn cu riba 16 Maart 2021 el a asalta e homber H.F. cu cuchiu y a bay cu un holoshi.

ASESINATO DI POENTJE

Hues sigui bisa cu 23 December 2010 a haya Poentje morto den cura di cas cu dos impacto di bala. E tempo ey polis a haci investigacion pero nada. Y manera ta conoci, despues di 11 aña a bolbe habri e caso y for di e investigacion aki a resulta den detencion di Rasmijn. Miembronan di Recherche for di investigacion a conclui cu tabata pa11’or y 34 minuut di anochi cu esey tabata e ultimo biaha cu Poentje a manda text via su cellular y un rato despues el a wordo asesina. A mustra tambe cu den vecindario a haya imagennan di video di seguridad caminda por mira cu den oranan di anochi un Nissan Sentra a yega unda cu un hende a baha y despues di mas o menos mey ora e persona aki ta core bay bek na e auto y core bay. Aki ta unda cu Fiscal ta conclui cu ta Rasmijn ta e persona aki. Hues a puntra Rasmijn si t’e. El a admiti di tabata ey banda pero no a tira ningun hende. El a bisa cu el a bay ey banda pa asunto di heroina. Tambe e sospechoso a bisa cu dos caya for di e caya un Poentje ta biba, el a bay cumpra heroina. Y segun su splicacion,   e tabata hopi ocupa y pesey tambe e la core. El a bisa cu e ta usa cocaina y marihuana henter dia. For di video por mira cu Rasmijn lo tabatin algo scondi bou su flanel. Rasmijn a bisa Hues cu e ta haci uso di su derecho di silencio. El a bisa Hues cu e no ta corda nada.

RASMIJN TA DESMENTI E ACUSACION

Despues cu hues a haci diferente pregunta, diferente biaha Rasmijn tabata insisti cu e ta haci uso di su derecho di silencio. El a bisa Hues cu na 2011 el a bisa tur cos caba na Recherche. A haci hopi interogacion e tempo ey. Na dado momento Rasmijn a cuminsa splica algun cos cu ta relaciona cu droga. El a bisa cu heroina bo no ta haya tur caminda pa cumpra. El a bisa cu e tabata usa cocaina y marihuana durante dia y anochi a bay cumpra heroina.

TESTIGO TA BISA CU TA RASMIJN A MATA POENTJE

Mester bisa tambe cu hues a menciona e persona di inicialnan K.M.G. y aki ta unda cu Rasmijn a bisa cu e conoce e persona ey di caya. Hues a indica e ora cu K.M.G. a bisa Recherche cu e conoce e persona riba video y a bisa cu Rasmijn a dun’e un saco cu algo aden pa warda pero pa no wak den saco. Segun K.M.G. el a wak tog den e saco y a mira un arma di candela. Despues Rasmijn lo a bis’e cu esey ta e arma cu el a tira mata Poentje Castro. Segun Rasmijn esey no ta berdad. Hues a bisa cu K.M.G. tambe a declara cu Rasmijn kier a deshaci di e Nissan Sentra pura. Segun Rasmijn el a laga e auto bay pasobra Polis e tempo ey tabata controla pisa riba Nissan Sentra.

Hues a menciona cu tin un testigo Q. kende a bisa cu e tabata drumi y a scucha un scooter for di Madiki bin y despues a scucha 2 pa 3 tiro y a mira un hende cu e ta reconoce como Rasmijn. Ta asina cu Rasmijn a desmenti categoricamente cu e tabata riba scooter y a bisa cu e ta haci uso di su derecho di silencio.

FISCAL A EXIGI 16 AÑA DI PRISON

Fiscal ta sigura cu despues cu a bolbe habri e investigacion, esaki ta indica cuRasmijn ta e sospechoso. Fiscal ta considera cu Rasmijn tabata gaña y pesey e tabata keda keto. Fiscal ta sigura cu e no ta kere storia di Rasmijn cu e lo a bay cumpra heroina, y ta mas bien cu Rasmijn mes a bay tira Castro mata.

Fiscal a tene cuenta, papiando riba e castigo, cu Rasmijn tin un carchi di castigo di 13 pagina y cu gran parti di su bida e la pasa den KIA.  Fiscal a admiti cu e caso Poentje a tarda hopi y no por splica pakico y esey ta influencia tambe e cantidad di aña di castigo cu mester haya. Y pesey a exigi  16 aña di prison. Pa loke ta e demanda di daño di e famia di Castro, Fiscal a pidi pa confirma algo mas di 7 mil florin cu ta gasto di entiero y pa declara no admisibel pa e otro gastonan y pa pone medida di pago.