Den Haag a celebra Dia di Aruba

DEN HAAG - Na Carlton Ambassador hotel na Den Haag a tuma lugar nu recepcion pa celebracion di Dia di Himno y Bandera di Aruba. Minister Plenipotenciario Alfonso Boekhoudt y sra. Hanneke Boekhoudt-Koets a ricibi diferente invitadonan, manera presidente di Eerste Kamer Ankie Broekers-Knol, minister Plenipotenciario di Curacao Marvelyne Wiels, vice presidente di Raad van State Piet Hein Donner, ex ministerraad Jan Laurens Brinkhorst y Hans Hillen. Tambe un cantidad di casi 40 embahador nan di diferente pais Europeo y Latinoamerica a duna acto di presencia na e recepcion di minister Boekhoudt pa cu Aruba su dia nacional.

DISCURSO

Durante di su discurso pa e invitadonan minister Boekhoudt a bisa cu Aruba ta celebra cu e ta un pais autonomo den Reino Hulandes, pero cu alaves Aruba ta brinda ariba e dia aki honor na su himno y bandera. "E celebracion aki tin hopi di haber cu e identidad di nos hendenan. Pesey nos ta duna atencion special na nos cultura, nos idioma y nos historia ariba e dia aki. Un historia cu ta mustra cu un pais chikito y autonomo por enfrenta su destino cu cooperacion cu otro pais. Un ehempel di e cooperacion aki ta e Pre-Clearance Mericano na nos aeropuerto y e proyecto pa bin cu pre-clearance pa vuelonan pa Europa."

DIA NACIONAL

Finalmente minister Boekhoudt a bisa cu e dia aki ta un celebracion di nos dia Nacional, hunto cu nos partnernan y amigonan. "No unicamente nos tin amor pa e momento aki den historia di nos pais, pero tambe nos ta tira un bon bista loke ta spera nos y con nos por enfrenta e retonan nos dilanti y cu mi ta spera cu nos por conta pa esaki ariba boso aporte," asina Minister Plenipotenciario Alfonso Boekhoudt a bisa.