Corte ta trata caso asesinato Poentje Castro integralmente diabierna

ORANJESTAD – Tratamento integral di e caso di asesinato di e conocido personalidad Poentje Castro, ta tuma lugar diabierna esta mayan, 6 di mei 2022. Den e caso aki, e sospechoso principal A. Rasmijn (35) lo mester defende su mes contra e acusacion di asesinato y posesion di arma di candela riba dia 22 di december 2010.

E CASO 

Tabata na December ultimo cu Corte a trata e caso pro forma, unda cu e.o abogado di Rasmijn, esta mr Vito Carlo, a bisa hues cu a pidi pa un psikiater pa determina si e sospechoso Rasmijn ta compronde kico e acusacion contra dje ta. E abogado a bisa e ora ey cu tin un peticion pa haci e investigacion y pa asina Corte por nombra un psikiater cu mester haci e investigacion. E ora hues a bisa cu mientrastanto a nombra un psikiater riba 15 di December aña pasa cu tabatin como tarea pa investiga Rasmijn. 

Fiscal a sigui mustra e dia ey cu mientras cu tin un investigacion habri, no por para e investigacion. A mustra ademas cu p.e. na Hulanda tabatin un caso caminda a sigui cu e investigacion te ora cu e rapport di e psikiater a keda cla, unda cu a dicidi e ora cu no ta sigui mas cu e caso. A mustra e ora cu aki kier mesun procedura. Hues riba esey a puntra cuanto tempo esey lo dura, pero fiscal a informa cu e no tabatin e informacion ey. Fiscal ademas a bisa cu mester di mas tempo pa trata e caso y a propone pa esaki dura un dia completo y pa e fecha ta dia 22 di maart 2022 cu tabata e fecha pa tratamento inicialmente. A mustra cu mester tene cuenta cu e investigacion y cu hues mester manda e caso pa hues comisario pa asina e deseo di abogado Carlo keda realisa. Asina e psikiater no tin ningun duda kico mester haci. Hues a puntra e ora si e caso mester wordo trata pro forma atrobe. Fiscal a mustra e ora cu e kier reserva e fecha ey pa en caso no keda cla, cu por usa esaki pa trata e caso atrobe pro forma. 

VIDEO

Abogado Carlo a mustra cu su cliente a informa cu e la wordo interoga for di 2011 caba y a graba esaki riba video pero no tabatin nada mas. Ademas e la haya mas straño  cu apenas el a keda apunta como abogado, ya prensa a yam’e. E ta mustra cu for di April 2021 ministerio publico a publica cu a habri e investigacion di nobo. Tambe ta remarkable cu e procesverbaal ta data di 2011. E unico cos cu a bin acerca ta e declaracion di G. Morales. A mustra cu e portal 24ora.com por ta influenciando e caso. Y e abogado ta haya cu e caso aki ta wordo influencia door di prensa. Fiscal riba esey a mustra cu tin libertad di prensa y ta ked ana cada uno pa publica. E la admiti cu prensa ta influencia e caso pasobra 10 aña no tin nada di e caso y comunidad kier sa kico ta pasando. Y esey ta algo cu ni fiscal, ni abogado of huez por haci algo contra. 

Hues a bisa e ora cu tin suficiente indicacion cu Rasmijn ta envolvi. Tin video caminda ta mir’e core for di e caso y cu un saco. E momento ey, e la haya na interes di e investigacion pa pospone e caso pa dia 25 di maart 2022 pa 8’or y mei y manda e caso bek apa hues comisario pa laga psikiater haci e investigacion riba Rasmijn. Tur esey a tuma lugar y e fecha mes pa e caso despues a bira diabierna 6 di mei 2022, esta mayan mainta pa 8’or y mei.