KPA: ‘Transparencia y profesionalismo pa resolve caso di accidente fatal’

ORANJESTAD – ‘Polis ta sigura comunidad (di Aruba), cu ta atendiendo e caso aki cu tur profesionalismo, garantizando transparencia y den contacto estrecho cu fiscal na ministerio publico’. Aki ta referi na e accidente di diabierna anochi, di cual diasabra merdia e hobencita Zinnia Croes a fayece. Esaki ta e di dos intento di banda di cuerpo policial, pa sigura comunidad cu polis no ta midiendo cu dos midi. "Nos tur di Cuerpo Policial ta conmovi pa e accidente fatal den fin di siman” Alto Comisario mr. Dolfi Richardson a duna di conoce pa medio di un comunicado.

CRITICA CONTRA POLIS

Polis a bira blanco di critica for di fin di siman pasa despues cu di e accidente, causa pa un agente policial cu tabata core auto na civil. E polis despues a resulta di tabata bou di influencia segun testnan preliminar haci pa coleganan polis na e sitio. E hecho cu e polis a wordo laga den libertad, a crea un ola di protesta y critica riba retnan social, indicando cu autoridad ta midiendo cu dos midi. 

MAS CU NORMAL

Segun e Alto Comisario, ‘tur morto den trafico ta di un mas’. Y den mas intento pa mustra cu nan ta trahando duro, ta bisa cu ‘nos ta haci hopi esfuerso, aloca hopi recurso humano, hopi ekipo y aloca hopi fondo den prevencion di accidente. Esaki dor di suministra hopi mas informacion na publico, combina cu control regular riba caminda, den cual ta controla riba velocidad y chauffeurnan cu ta stuur bou influencia di alcohol.’ No ta conoci si esaki ta wordo haci pa tur caso, y si esaki ta un intento ‘extra’ pa logra soluciona e caso aki mas liher cu ta posibel, mirando cu tur wowo ta riba polis aworaki.

ORACION

"Mi ta haci un apelacion riba tur Polis pa nos uni den oracion y hunto resa pa descanso di e criatura y pa nos bon Dios por yuda e mayornan y famia den e momentonan dificil aworaki. Nos palabranan di condolencia na tur famia y hopi forsa den e dianan aki", asina Alto Comisario mr. Dolfi Richardson a finalisa su mensahe.

INVESTIGACION

Mientrastanto investigacion ta continua, y e polis responsabel pa e accidente, ta un persona liber. No ta conoci si e persona aki a haya un castigo disciplinario pendiente e investigacion, ni si ta wardando riba e resultado di e investigacion, prome cu tuma e siguiente paso. Intento pa haya e informacion aki, no a logra.

ENTIERRO

Pa loke ta e entierro, esaki lo tuma lugar mayan mainta na Capiya Santa Famia na Pos Chikito den oranan di mainta. A pidi tur hende pa no bin bisti na rouw, y tampoco pa saca potret. Awe nochi tin posibilidad pa tuma despedida tambe durante condoleance na Aurora Funeral Home for di 6or pa 9or di anochi.