Cacho crioyo di Aruba centro di caso hudicial na Merca

NORTH ATTLEBOROUGH – Un cacho crioyo di Aruba ta e motibo di un caso den corte di Merca. Un hues mericano tin cu dicidi si e cacho ta keda Merca of ta bolbe su isla natal Aruba. E   ‘doñonan’ mericano no ta dispuesto pa ‘debolbe’ e cacho cu , -segun nan-, a keda legalmente adopta durante nan estadia na Aruba aña pasa. E doño di Aruba, -Cornelia Hajdinyak- , ta insisti cu e cacho ta di dje y cu e pareha mericano a coi e cacho y hib’e Merca den apenas dos dia. E caso a haya asina tanto atencion cu prensa mericano a gara esaki y crea un noticia rond di dje. Varios canal di television a presenta un raportahe riba dje y tambe den prensa skibi. 

NOMBER

E cacho mes, un cacho ‘crioyo’ practicamente blanco di color, pa e doño di Aruba, yama whitey. Pero e pareha mericano O’Connell  ta yama e cacho ‘Coco’.

KICO A PASA

For di aña pasa e cacho ta biba na North Attleborough cu Dan y Lisa O’Connell, y a haya e nomber nobo ‘Coco’. Segun e pareha mericano, nan a haya e cacho riba un beach na Aruba banda di e hotel unda cu nan tabata keda. “Nos a nota cu e (cacho) tabata dehydrata, cu hamber, yena cu carpata” Dan O’Connell a bisa. Nan a hiba e cacho un veterinario aki na Aruba, y a bay resulta serca hendenan di Animal Relief Foundation. Supuestamente e fundacion lo mester a regla tur documento pa e cacho por a biaha pa Merca cu e pareha. Nan (e pareha) lo a haya te hasta un pasaporte pa e cacho.

DOÑO DI ARUBA

Pa nan sorpresa, algun siman despues di a bay bek Merca, nan(e pareha mericano) a ricibi un email di e fundacion, indicando cu un persona tabata busca e cacho cu nan a caba adopta. Un post riba facebook, ta parse di ta di e doño, cu ta yama e cacho “Whitney’. “Mi cacho a wordo gara na Aruba y manda pa Merca den apenas dos dia” e post riba Facebook ta bisa.

REACCION MERICANO

E pareha mericano a bisa cu nan no ta debolbe e cacho. “Eticamente y moralmente, nos no ta bay manda e cacho bek” Dan O’Connell a bisa. “Legalmente nos a adopta e cacho segun tur leynan di Aruba, cu ta bisa cu nos por a adopta e cacho. Nos a pasa door di henter e proceso. Nos ta doño di e cacho”. E canal mericano cu a raporta riba e storia, NBC 10, no a logra comunica cu ningun hende na Aruba riba e caso aki.

LEY DI CACHO?

Mientrastanto riba e pagina di Facebook, e doño ta bisa cu segun abogado, e cacho ta di dje, y cu pa por adopta y bira doño di e cacho, esnan cu ‘haya’ e cacho, mester informa tur autoridad competente corectamente di nan hayazgo. Tambe nan mester warda por lo menos un aña prome cu por hiba e cacho aki. Pero no ta conoci si esaki lo por keda determina, pasobra e cacho no tabata ‘gechipped’, pues de hecho, e ta un caso cu por bay tur banda.

ADOPCION CANINO

No ta in usual pa turistanan mericano bishita Aruba y adopta un cacho cu nan haya riba caya, y hibe nan pais bek. De hecho, e ta un practica basta comun y cu te hasta ta wordo sosteni pa basta instancia local y tambe gobernantenan. Awor cu e caso di ley di cacho, parlamento a sostene un posibilidad pa posibel adopcion di cacho crioyo door di turistanan mericano, wordo promovi. Foto cortesia The Sun Chronicle.