Encuesta: Mayoria tin molester cu cachonan di caya

ORANJESTAD – Segun e resultado di e encuesta di noticiacla cu e tema di mascota (cacho), mayoria cu a participa ta confirma cu  nan tin un problema cu cacho di caya na Aruba. Mes momento, mayoria di esnan cu a participa tambe a confirma cu nan tin un mascota (cacho), den un cura cera, y sterilisa. Mes momento sinembargo, e mayoria cu a participa den e encuesta ta admiti cu nan no tin nan cacho(nan) ge-chipped. Pa e encuesta aki, un total di 600 persona a participa durante 5 dia. 

CANTIDAD DI CACHO Y RASA?

Loke a resalta,- manera cu e encuesta ta mustra -, ta cu mayoria di esnan cu a participa (81%) a confirma cu nan tin por lo menos un mascota (cacho) den nan famia, y cu 42% tin te hasta mas cu dos. Esey ta bisa cu no solamente tin hopi hende cu tin cacho, pero cu nan tin mas cu un. Y di esnan cu tin cacho, un mayoria a contesta e pregunta di rasa, di cual 38% a bisa cu nan tin cachonan di rasa mientras cu 31% tin cacho crioyo. Y un grupo no mucho leu di esaki, esta 32% ta indica cu nan tin tanto cacho crioyo y di rasa. 

CURA OF NO

Loke tabata hopi importante pa sa, fuera di cuanto persona tin un of mas cacho, si nan tin un cura y si esaki ta uno cera. Esaki pasobra e problema grandi ta cu tin esnan cu tin cacho pero no tin un cura, of un cura cu no ta cera. Esaki ta pone cu e cacho ta sea keda mara henter dia, of ta simplemente cana riba caya ora cu e doño no tey (of tey). Den e encuesta aki, mayoria cu a contesta e pregunta aki, (91%) a indica cu nan cacho(nan) ta den un cura cera, y un grupo di ‘apenas’ 10% tin nan cacho den un cura cu no ta cera. Di esnan cu tin cura habri, 57% ta pasobra nan no tin forma pa cere (pa placa), y 25% no tin cura mes. Ta e 10% di cachonan cu ta yuda crea e problema, door cu nan ta subi caya, no ta bin bek, of ta yuda aumenta e cantidad di cachonan, si nan no ta sterilisa.

STERILISA

Un di e preguntanan importante tambe tabata si e cacho(nan) cu bo tin, (sigur si bo cachonan ta den un cura cu no ta cera, ta sterilisa. Mientras cu 90% di esnan cu a participa den e encuesta ta bisa cu nan tin un of mas cacho, e cantidad ta bira menos ora cu tin e pregunta si e cacho(nan) ta sterilisa. Esaki pasobra mientras 90% ta bisa cu nan tin cacho(nan), 60% ‘so’, ta sterilisa. Y un cantidad di 23% a bisa cu nan cacho(nan) no ta sterilisa. Y tin un grupo mas chikito, cu tin algun di nan cacho sterilisa y algun no. Y esaki tambe ta importante, pasobra e ta nifica cu nan tin intencion pa haci algo cu e cacho e ora, si placa no ta e problema. 

‘DEK’ CACHO

Y esaki ta confirma e posibel motibo pa no sterilisa nan cacho(nan). Ora cu pregunta si a sterilisa nan cacho(nan), di esnan cu a bisa cu nan cacho(nan) no ta sterilisa, 33%  a bisa cu esaki ta pasobranan kier dek nan cachonan, osea rasa nan cacho pa nan haya mas cacho (puppies). Placa no ta asina un ‘problemsa’ pa no sterilisa cacho, si tene cuenta cu ‘solamente’ 14% ta bisa cu nan no a sterilisa nan cacho(nan) pasobra nan no por a paga esaki. Pero un grupo relativamente grandi (44%) a contesta cu e motibo pa cual nan no a sterilisa nan cacho(nan) ta ‘otro’. 

CHIP BO CACHO

Un punto cu ta resalta den e encuesta y cu por ta un indicacion di e situacion, ta cu mientras cu 90% di esnan cu a participa a bisa cu nan tin cacho(nan), ‘solamente’ 42% ta admiti di a chip nan cacho(nan). Y e grupo mas grandi den e seccion aki cu ta 58%, ta confirma cu nan cacho(nan) no ta gechipped. Interesante ta cu e grupo cu no a chip cacho(nan) pasobra no tin e placa, ta mas chikito cu e grupo cu no ta chip pasobra nan no ta haye necesario (18%). Un otro grupo, basta halto, tin te hasta un ‘otro’ motibo cu nan no ta chip e cacho(nan). No ta conoci (den e encuesta aki), kico e motibo ey por ta. Pa loke ta e districtonan, segun e encuesta, e districto den cual nan ta mas activo cu cachonan gechipped, ta Oranjestad cu 46%, mientas cu San Nicolas ta e districto (segun e encueta aki), cu tin menos hende cu cacho gechipped (36%). Asina mes, den tur districto, e cantidad di cacho no gechipped, ta surpasa esun gechipped. 

MOLESTER  

Algo cu a resulta den e encuesta, ta cu un grupo basta grandi, (68%), ta considera cu e asunto di cacho di caya ta un molester na Aruba, mientras cu un grupo mas chikito,- algo menos cu mitar (29%) -, no ta kere cu Aruba tin un problema di cachonan di caya. Mientras cu entre esnan cu a contesta e pregunta aki, ta resulta cu tur districto e molester ta surpasa esnan cu tin menos molester (68%), e districto cu ta raporta di tin mas molester di cacho, ta Savaneta cu 74%, mientras cu esun cu tin menos molester (segun e encuesta aki:red) ta 62%. 

IMPUESTO 

Den e encuesta, tabatin hopi resistencia pa e sugerencia pa bin cu impuesto pa esnan cu ta doño di un cacho of mas. E ta un posibilidad pa controla e fluho di cacho na Aruba, y ta algo conoci rond mundo, incluyendo Hulanda. Sinembargo 63% cu a participa den e encuesta aki, a rechasa e opcion aki. Algo mas cu mitar, di otro banda, (37%) ta pro e idea pa cobra impuesto, y entre e grupo aki, e cantidad mas grandi (56%) ta pensa cu mester cobra impuesto pa cada cacho cu bo tin, mientras cu 22% ta pensa cu bo tin cu paga un suma fiho di impuesto, no obstante cuanto cacho bo tin. Y e otro opcion ta 22% di esnan cu ta pensa cu bo tin cu paga impuesto solamente si bo tin mas cu un cacho. Segun e encuesta aki, esnan den e districto cu ta mas contra impuesto ta Noord cu 67% di rechaso, mientras cu esun cu tin menos problema ta districto di Santa Cruz cu 58%. Mester bisa si cu den tur districto, e rechaso pa impuesto pa cacho ta surpasa e otro opcion. 

DISCLAIMER 

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 600 persona a participa na e encuesta (e mester ta minimal 500 pa por tin un representacion), di cual mayoria tabata hende muher.