Aruba no ta cla pa ricibi biaheronan di islanan ABC y BES cu solamente cedula

ORANJESTAD – Entrante diadomingo 1 di mei 2022, esta ayera, ciudadanonan di islanan BES y Corsou y St Maarten cu ciudadania Hulandes, por bula entre e islanan ey cu solamente un cedula envez di un pasaporte. Aruba ainda no. Por lo menos, no si bo kier biaha di e destinacionan menciona, rumbo pa Aruba cu bo cedula, pasobra Aruba ainda ta rekeri un pasaporte valido. Minister di Husticia di Aruba Rocco Tjon a confirma esaki dialuna pa Noticiacla.com. Pa awor Aruba lo tin un papel ‘pasivo’ den e proyecto piloto. E mandatario a sigura cu pa 2023 Aruba lo dicidi finalmente si e tambe ta participa activamente. 

ROL PASIVO

Cu rol pasivo e mandatario kier men cu ta permiti si, pa biaha for di Aruba pa e islanan menciona cu solamente un cedula. Pero drenta e isla (Aruba), ainda no. “ Despues di e pilot project, nos lo tuma un decicion final” e mandatario a sigui bisa.”Nos ta uza e tempo aki pa monitoria e aspectonan di seguridad, paso tin cierto preparacion, cu ta costa placa, lo mester tuma lugar” sr Tjon a sigui bisa. “A base di e resultado di e pilot project nos ta tuma un decicion final”. E mandatario a sigui bisa cu mientras cu na juni awor tin e proximo reunion di husticia entre e islanan, esun na comienso di 2023, Aruba lo tuma su decision final.