Yiu homber di ex minister encarcela pa sospecho di estafa den caso Flamingo

ORANJESTAD – E yiu homber mayo di ex minister Otmar Oduber, J.A.Oduber despues di a keda deteni diamars mainta, a keda encarcela anochi, despues di a pasa su prome dia den interogacion. Abogado di O, mr Demis Illis a confirma pa noticiacla cu su cliente ta wordo sospecha di estafa. Manera ya informa, e vocero di Ministerio Publico Ann Angela a confirma pa e portal aki cu e detenido di awe ta relaciona cu e caso penal Flamingo di cual e tata, e ex minister ta e sospechoso principal. “A detene e persona J.A.O. Awe den (caso) Flamingo” Angela a bisa e portal aki. Na salida di su interogacion na Landsrecherche, a scucha e tata papia cu e portal 24ora.com, sigurando cu tur cos ta bay ta bon, y cu su yiu ta un bon mucha homber y masha keri. E yiu mes tabatin un sonrisa riba su cara ora cu e la drenta e van di CEA, cu a transporte pa un warda di polis unda cu pa ley, e mester keda dos dia cera. No ta descarta sinembargo, cu e por recobra su libertad mas prome cu esey, dependiendo cuanto dia mester pa sigui interoga e sospechoso. 

E CASO

E caso a cuminsa core for di 2019, unda cu a haci varios entrada hudicial, incluyendo na cas di e ex minister. Despues no a tende nada mas y diripiente e anja aki a cuminsa haci detencion relaciona cu e caso aki. Tabatin e anja aki por lo menos 2 detencion caba, y cu esun aki, ta bira e di tres. Ministerio Publico a bisa caba cu no ta descarta cu lo tin mas detencion cu lo cay. E caso ta trata di otorgamento di tereno di gobierno den un forma ilicito y ta trata e periodo cu e awor ex minister tabata den funcion como minister di infrastructura.