Parlamento di St Maarten convenci cu no mester sostene COHO

PHILIPSBURG - Parlamento di St. Maarten no ta sostené e proyekto di lei di COHO den e forma ku e ta presentá aktualmente. Esei di akuerdo ku un karta ku presidente di parlamento di e pais, sra. Grisha Heyliger-Marten, a dirigí na Promé Minister sra. Silveria Jacobs. Den e karta na nòmber di parlamento e presidente ta introdusí su mes bisando ku nan a skucha ku masha atenshon e kontestanan ku e mandatario a duna durante e seshon informashon tékniko riba e lei di COHO i tambe a sigui e deliberashonnan riba e konsepto di lei den komishon sentral a base di un presentashon duná dor di gobièrnu.

Basá riba e situashon aki, tambe despues di revisá henter e pakete, e kontribushon di diferente eksperto Hulandes Karibense, i teniendo kuenta ku e informashon i desaroyonan, awor mas ku nunka e ta konvensí ku e konsepto aktual di COHO no por i no mester ser sostené dor di Parlamento di St. Maarten.

Segun sra. Heyliger-Marten, for di loke e por a saka afó, esaki no ta kumpli kompletamente ku leinan lokal, ni den Reino ni internashonal, i ku e lo no ta na benefisio dje pueblo di St. Maarten. Tambe el a referí na un reunion anterior den kual Promé Minister a duna di konosé ku, konsiderando e progreso ku tin pa loke ta e reformanan ku St. Maarten a disidí di implementá, lo no ta nesesario pa bini ku COHO. Durante e reunion ei asta e mandatario a rekomendá kon Parlamento lo por kontinuá ku e trayekto.

Ademas konsiderando e kantidat di skandalnan ku tin kaba denter di gobièrnu Hulandes ku ta kostando e pagadó di belasting algun miar di euro i lagando miles di hende inosente komo víktima, segun e presidente e no ta kere ku gobièrnu Hulandes lo ta den e posishon pa nombra hende ni implementá un COHO ku lo funshoná na interes di St. Maarten.

Teniendo kuenta tambe ku moshonnan ku a ser entregá den 2de Kamer na Hulanda, sra. Heyliger-Marten ta bisa ku e lo ke un aktualisashon por eskrito i un plan di akshon dje trayekto teniendo kuenta ku e nòmber dje miembronan representando St. Maarten a ser entregá na gobièrnu Hulandes mas ku un aña pasá.

Despues di a konsultá diferente eksperto internashonal riba tereno di koperashon pa desaroyo, reforma konstitushonal durante un resiente reunion parlamentario na Panama i Argentina, e ta aun mas konvensí ku e úniko manera pa St. Maarten logra su ophetivonan pa desaroyo i ambishonnan, ta dor di traha fuera di Reino. NOTA: Texto scirbi den Papiamento fonetico di Corsou.