Exit poll: D66 ta gana grandi, VVD y PvdA ta perde

DEN HAAG – E partidonan di coalicion VVD y PvdA a perde votadornan den e eleccionnan provincial awe. D66 a casi double nan cantidad di voto, segun e ‘exit poll’ di Ispsos, conduci riba peticion di N.O.S. VVD segun e poll, ta perde 4 asiendo den Eerste Kamer y ta keda cu 12. PvdA ta perde 6 y ta keda cu 8 asiento. D66 ta bay di 5 pa 9 asiento den Eerste Kamer. CDA ta gana 1 asiento y ta yega 12. E supuesto coalicion di tolerancia, esta D66, ChristenUnie y SGP ta perde e mayoria den senado, aunke cu D66 banda di e partidonan conservativo cristian hunto a gana 2 asiento. Segun e exito poll, Sp ta e di tres partido mas grandi na Hulanda awor. PVV ta perde 1 asiento y ta keda cu 9 asiento. Groenlinks ta keda cu 5 asiento, y tanto 50Plus como partido di bestia ta aumenta te na 2 asiento y e fraccion independiente ta keda cu 1 asiento.

VOTAMENTO

E prome informacion cu NoticiaCla.com a presenta awe riba e eleccion tabata cu un cantidad di 24% di e votadornan te cu 3:30pm (ora di Hulanda) a eherce nan derecho di voto pa e eleccion provincial . Esaki ta 4% menos cu 4 aña pasa, segun e oficina di investigacion Ipsos. E resultado final di asistencia di voto cuater aña pasa tabata 55,9 cu ta remarcablemente hopi. E eleccionnan anterior semper tabatin menos asistencia. Pero e asistencia semper ta menos cu pa eleccionnan parlamentario.E prome urnanan electoral tabata habri for di 5’or di mainta (ora di Hulanda) cu ta na Castricum y Nijmegen. Resto di e urnanan a habari 7’or y mei. Tur urna a keda habri te 9’or di anochi (ora di Hulanda), cu ta 4’or di atardi ora di Aruba.